عبدالمنعم شجرابي يكتب | مقتطفات الجمعة | يصنعون الفرح
قال خبير في الصناعات الحربية : المسيرات طيور طائرة يصل واحد منها إلى هدفه
نعم هكذا كانت ( مسيرات ) الهلال ( ومسيرة فلومو ) نزلت مستقر لها
( ولا عزاء للمريخاب )
*** نزح السودانيون إلى القاهرة وحالهم يغني عن السؤال وفي رحلة العودة للوطن يجهز بعضهم للقطط ( الأوراق الثبوتية ) ليصطحبوها ( مواطنة ) وما أشبه حالهم بحال المريخاب .. قبل المباراة ( يجننوا ) وبعدها ( يحننوا )
*** قالوا ثلاثة يزلن الحزن الماء والخضرة والوجه الحسن وأجزم أنهن أربعة ( والرابعة ) والكرة ( تتهادى ) في ( سلة المريخ )
*** وصوت قارئ يتلو ما تيسر من سورة الكهف براديو عربة الأجرة التي ركبتها لاحظت ( الصليب ) مرسوماً على يد السائق والتفت إلى رقبته ووجدته يرتديه سألته لماذا القرآن وأنت كما هو واضح مسيحي أجاب الصليب لي والقرآن لك هذه الواقعة إضافة لتعامل السوق المصري الجيد مع ( الزبون ) يؤكد أن الإنسان المصري ( متخصص ) علاقات عامة ( تخصص ) هلال السودان في الفوز بالممتاز
*** الصالون اتملا أولاد الحلة كلهم حضروا الكورة عندنا أصواتهم كانت يا شدرابي ود خيتي ست الجيل عالية وكانوا منفعلين وأنا كانت خايفة من الشكل لكن الحمد لله طلعوا زي ما دخلوا زينين ..
يا سلام يا سلام اهي دي يا بت أحمد الروح الرياضية والحكاية تنتهي مداعبات وعكننة بريئة بت أحمد ربنا يحفظك ويملا جوفك صحة وعافية
*** ويعني شنو لو غلبناكم ما كتير وكتير غلبناكم ولو جيتوا تاني حنغلبكم
( ونحن كده انتو كيف )
*** بعد انتهاء عزاء الراحل المقيم الفنان مجذوب اونسه ونحن بالشارع سألت أحد الفنانين انتوا ليه ما عاوزين ترجعوا السودان رد أحد العازفين نرجع عشان شنو وكل أعراس السودانيين بالقاهرة .. الرد المقنع والسريع كانت أسرع قذيفة فلومو في شباك المريخ
*** ما كانوا يتحدثون عن فشل المدرب ولا ضعف اللاعبين ولا عجز إدارة الكرة كانوا يتحدثون عن المريخ الجديد عن فريق الأحلام ويكثرون الحديث
( لكن لسان الهلال غلب )
*** سنة 21 .. و22 .. و23 .. و24 .. و25 .. والهلال بطل .. خمسة سنين والمريخ ( وصيف ) وخمسة سنين والأهلة ( يصنعون الفرح ) وأكتر من كده ( نعمل شنو !!؟؟ )
*** مجلس إدارة الهلال يستحق التهاني والتبريكات مثنى وثلاث ورباع ولو سمح لي شعب الهلال لأهديت النصر لجماهير الهلال بموريتانيا ورواندا فبتلك البلاد هلالاب خلصاء
*** بعنفوان البطل وشيمة العظماء وقمة المزاج نخت ( رجل فوق رجل ) لكأس العالم ( والهلال عالم جميل )
*** عشان تعرفوا وتتأكدوا وتقتنعوا أن ( الحياة حلوة ) وحلوة شديد وحلوة خالص عليكم أن تتخيلوا لو انتصر المريخ بالأربعاء وخسر ( الأسياد )
.. عفواً لا تيأس ( كرر المحاولة مرة أخرى )
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمنا مطمئنا ..
جمعة مباركة وكل جمعة وانتو طيبين
عبدالمنعم شجرابي ..
