العدو العاقل اخير الف مرة من الصديق الجاهل….بالضبط ده في حالات د جبريل وزير المالية و(الحيميت) حميدتي.
* د جبريل زول سوداني من دارفور متعلم جدا وزول مسلم
وهادئ و(احسب) انه زول (مؤدب)..ده رأي الخاص في دكتور جبريل وزير المالية الحالي….عكس حميدتي جاهل وغير عاقل وزول اي كلام …وبتغشه في علبة (صلصة)…ولما كان د جبريل متهور وتنبعث منه رأئحة الجهوية والعنصرية في تصريحاته هذه الايام …و رغم ان ديانته الاسلامية تحرم عليه ذلك لكن يبقي هو دكتور جبريل الاخ العاقل الذي يمكن ان تتقاسم معه هم الوطن بهدوء .
* شوف يا دكتور جبريل اكون معاك واضح انا بحترمك جدا وقلت الكلام ده هنا كم مرة وكتبته كان قريته وللا ما قريته ما مهم المهم انه الرأي العام عرفك تماما من خلال ما كتبت. عنك هنا.
* شوف قصة تسوق الناس معاك بروح عنصرية وجهوية من ناسنا ناس دارفور دي خلاص انتهت وخلصت الان انسان دارفور كشف كل المستور الذي كان يتاجر به رجالات السياسة الكاسدة الخائبة التي اخرت السودان وحطمت طموح وتقدم انسانه الطيب.
* مافي دارفوري بمشي معاك في الاتجاه ده….لانه قصة ظلمونا وشالوا حقنا دي اصبحت واضحة جدا وانسان دارفور الحمد لله بقي.زول واعي.وفاهم الحاصل بالضبط وعارف منو الاكل حقه ومنه الكان سايقه بالخلا.
* اخي جبريل المثل بقول مافي دخان بدون نار…..واي شئ يطفح علي سطح السوشال ميديا ما كذب وان كان…بتكون فيه نسبة من الحقيقة ودحين يا اخوي انا بكلمك وبنصحك وثقتي فيك كبيرة جدا جدا انك انت زول محل احترام لانك متعلم وواعي مافيه الكفاية تكون عرفت مصير الطمع الناتج عن زيادة الافتراء بوصل وين؟ وعندك تجربة حميدتي خير نموذج يحتذي به للجهلاء الذين يريدون القفذ بالزانة فتنكسر رقبتهم ويذهبون بعد ان كانوا يعيشون في عز و(منجهة) لكن ذهب عنهم كل شئ نتيجة الجهل والطمع….والان انت ماشي بنفس الصورة وفي نفس الاتجاه وانت غير مدعوم وغير مسنود من اي جهة خارجية او داخلية ولن تجد …عشان كده موقفك (طينة ونيلة) (زينا)…دحين يا اخوي عيش زينا وارضي بقسمة ربنا القسمها ليك .
* انت يا دكتور جبريل عايش في نعيم وعز علي حسابنا يعني نعيم اهل السودان الشعب السوداني من الشمالية ودارفور والجزيرة والشرق وكردفان بحكم انك وزير …متزوج اكثر من امرأة وتعيش حياة رغدة ..وزواج ابناءك في اغلي الفنادق وارقاها وده كله ونحن ما حاسدنك ولا ساكنك….ونحن زوجة واحدة ونفسنا قائم واتغربنا تشريدا وحياتنا نحمد الله عليها… بنزينا من جيبنا وعرباتنا من جيبنا وسكرنا ومعيشتنا من جيبنا….وحامدين ربنا لا شكينا لا بكينا لا شلنا سلاح وده كله كان في مقدورنا نعملوا لكن ما بنخون وطنا ولا اهلنا وكايسين السلام….ولا عندنا اتفاقية جوبا عشان نتمسك بيها جهويا وعنصريا.
* انفاقية جوبا دي.منزله في القران ؟؟ وللا ياها الوقعوا عليها اسوأ خلق الله في.حكومة السودان الفوضهم الشعب …ناس امييين لو ما الدنيا دي شكلها غريب حميدتي شنو البوقع نيابة عن الشعب السوداني….عشان هو مافاهم (التكتحه)…لكن رضينا وقلنا ناس د جبريل ديل يكفي انهم سودانيين بالحق والقانون و ليسوا كحميدتي الذي قال السيد موسي هلال انه اجنبي مرتزقة وللا ما ما كدي يا دكتور؟
* ما علينا البقت بقت…اني لك من الناصحين….ما تعاند وانت ارفع من كده وما تركب راسك وتشيل صباعك و(تطبظ)عينك…وباكر تندم وتقول ياريت ….وياريت عمرها ما عمرت ليها بيت.
* السيد دكتور جبريل…البلد الحمد لله بدأت تتعافي من دنس التمرد وانتم من ساهمتم في المشتركة مشاركة لا تشكرون عليها لاننا نجزم انها من واجبكم الوطني وانتم سودانيون بالرقم الوطني ونحن نعتز بذلك ان تكون انت سوداني ونحن كذلك يجمعنا وطن كالسودان…جاء الوقت لنحميه وندافع عنه ونستشهد ليبقي هو دون من منا ولا اذي.
* اكرر اخي دكتور جبريل عندما تم تكليفك بوزارة المالية لم نعترض ولم نستخسرها عليك فقط لانك سوداني متعلم فاهم تستحق بشهاداتك….ياخ حميدتي الأمي كان رئيس اللجنة الاقتصادية العليا بالبلاد ونائب رئيس مجلس سيادي البلد كلها …لو ما البلد دي الدخلت فيها تمرق …ناهيك انت د جبريل الذي نقدرك ونحترمك.
* ليس هناك ما يعطيك الحق في هذا الوطن اكثر منا ولكن ..فقط نشعر انك تستحق…ويجب ان تشارك لكن ما اسمعه منك شخصيا هذه الايام وتصريحات متفلتة حول اتفاقية جوبا وانه لا يستطيع احد حلها وكلام فيه نبرة ما (حلوة) نبرة تهديد ووعيد لا يمكن اصدق انها يمكن ان تصدر عنك وثقتي وفكرتي فيك وعنك بلا حدود فهي طيبة.
* اخي دكتور جبريل انا عشت في دارفور والله كنا نتم من اهلنا هناك من اهل دارفور الناقصة من نقص في مرتباتنا …ونحن في وظائف كبيرة …هذا معناه الحال من بعضه….فقط كنا نعيش عز وفرح لاننا كلنا سودانيين شمال غرب وسط شرق …وتبا للجنوب الذي انفصل وقتلنا خيانة وقناصة.
* دكتور جبريل …انت ستظل محل احترم مني انا شخصيا متي ما لم تخب نظرتي فيك…عارف ليه لانك عاقل وتقيل ورزين …وما تشيلك الحماسة والعصبية لاي سلوك صدر من احد في مابينة الحكم …لا تنظر له انظر لنا نحن في الشعب السوداني في القاعدة الكبيرة التي لم تعترض في يوم ان تم ترشيحك رئيس مجلس وزراء وانت رفضت….ولعلمك نحن او انا شخصيا اعرف سبب رفضك…للمنصب….لانك تعمل
بالمثل البقول …(امسك في البقرة الشطور)…وهذا ما رصدناه في تسجيل فيديو لك مع شباب دارفور اول ليالي تنفيذ اتفاقية جوبا عندما سألوك لماذا المالية ؟ كانوا يرونها نصيب تعبان دايرين سلطة ولا يدرون انك كنت تدري جيدا ماذا تريد…قلت لهم يومها نحن رضينا بالمالية عشان نشيل اموالنا اولا….واردفت قائلا نحن عاوزين نحكم السودان كله….فهللوا وكبروا… وحينها قلت من هؤلاء يا تري اليسوا هم السودانيون في دارفور …وين اذا المشكلة ؟
* دكتور جبريل …الشعب السوداني هو من يقرر من يحكم وبالحق والقانون …من هنا فصاعدا كل الذين جاءوا للحكم بالندقية ذهبوا بارادة الشعب وعدم رغبته في حكمهم رغم قوتهم وتمكنهم وانت كنت منهم يوما ما.
* دكتور جبريل ارجو الا تفقد احترامنا لك فليس البرهان هو السودان نعم هو يحكم السودان وبي حقه كسوداني ولكن اذا اختلفت معه لا قدر الله فلا تظن انتصارك عليه يعطيك حق ان تحكم السودان السودان تحكمه بارادتنا نحن الشعب السوداني من دارفور وحتي اعماقه كافة…وليس بمزاجك وجهويتك وعنصريتك التي لا تشبهك ولا تشبه اخلاقك ولا فهمك ولا وعيك ….بل غريبة عليك نشتمها من تصريحاتك هذه الايام……و(النصحك كده ظلمك).
سطر فوق العادة :
اخي دكتور جبريل انصحك بحكم سودنتنا وحبنا لوطنا….لا تأخذك الهاشمية مأخذا….فحميدتي ذهب من البرج العاجي….. وهو يمتلك كل شئ واي شئ …وحتي نحن كنا نظن فيه الخير ولكنا كنا نتوجس من نظرات عيونه….علي فكرة انا اعرف حميدتي معرفة شخصية يومها… ولم اعد اليوم احترمه بل احتقره….انت فاهمني….تظل المشتركة محل احترام وتقدير من كل الشعب السوداني….لحسن صنيعها في معركة الكرامة رغم حيادها الغريب وضبابية موقفها بدءا ولكن ان تأتي متأخرا خيرا من ان لا تأتي …..ودارفوربلدنا.
(ان قدر لنا نعود)
