مقالات

عبدالمنعم شجرابي يكتب: محمد طاهر.. مذيع..مخرج..مدير..حلفاوي نص كم رافض للولوة والخمج

*محمد طاهر.. مذيع..مخرج..مدير..حلفاوي نص كم رافض للولوة والخمج..!*
الو منو ؟
محمد طاهر
محمد طاهر ازيك وكيف حالك وعساك طيب معاك عبد المنعم شجرابي جريدة المستقلة و محمد طاهر منو بالكامل ؟
*اهلا بيك شجرابي واهلا بالمستقلة الاسم كامل محمد طاهر محمد ابراهيم محمد خليفة بدر عامر أحمد يوسف موسی
× الحمد الله الوقفت في موسى كنت خايفك تواصل يا استاذ اتولدت وين ؟
*اتولدت في وادي حلفا من اب جعفري ومن أم بديرية كوارتية
× يعني حلفاوي غير كامل الدسم ؟
* ايوه حلفاوي نص كم
× قریت وين واتخرجت شنو ؟
*بديت بخلوة الشيخ عبد الرحيم تاجر في حلفا وأبو حمد الاولية ثلاثة سنوات ولان والدي يرحمه الله كان من خريجي الأزهر وعندو راي في أهمية تعليم الدين واللغة العربية قريت الابتدائي والاعدادي والثانوي في مدينة عتيبة التي تقع بين وادي حلفا واسوان واتخرجت من جامعة القاهرة الفرع آداب جغرافيا
× استاذ محمد طاهر اخوانك واخواتك منو وانت رقم کم ؟
* الكبيرة رقية يرحمها الله ونعيمة وآسيا وفتحية وصفية وآمنة واخواني عبد القادر يرحمه الله وصلاح توفى صغير وأنا الحتالة .. يعني انا الطيش ..
× ربنا يرحم الميتين ويحفظ الاحياء أها اولادك منو ؟
* ما عندي ولد عندي ثلاثة بنات ندى خريجة علوم ادارية وتقيم مع زوجها بالامارات ولينا إختصاصي نساء وتوليد وأستاذة بجامعة التقانة ونسرين خريجة التقائة تعمل بشركة هندسية.
× وانت حبوبة مش كده ؟
*حبوبة ونص وخمسة ومن بناتي الحمد الله جاني الولد ..
×عيني باردة ربنا يحفظهم ويغطيهم طيب قول لي دخلت الاذاعة سنة كم وكان معاك منو ؟
*سنة 57 والدفعة كلها كنت أنا براي والأستاذ علي شمو عمل لي المعاينة ومراقب الاذاعة او المدير بلغة اليوم كان محمد عبد الرحمن الخانجي من ناس مدني .
×طيب منو من المذيعين دخلوا الاذاعة قبلك ومنو جووا بعدك مباشرة ؟
*سبقني في الاذاعة عمر عثمان وبعدي جاء حمدي بدر الدين ومحمد خوجلي صالحين وأحمد قباني ..
× المبدع لا يشيخ فهل احس الاستاذ محمد طاهر بالشيخوخة الاعلامية ؟
* يا زول لا شخت ولا حاجة وأنا في ريعان ا”لشيب”
×طيب وين خبرتك وخبرات غيرك المتراكمة في العمل الإذاعي والتلفزيوني؟
* قاعدة وبرضو ممكن أقول ليك مهملة .
×مهملة سهوا او عمدا ام عدم دراية ولا شنو بالتحديد؟
*عمدا عمدا عمداً
×مسلسلات كثيرة كانوا مقولوا من اخراج محمد طاهر يا ربي محمد الطاهر ده انت واللا واحد ثاني ؟
* أنا ذاتي محمد طاهر شمسيا وشخصيا وحقيقة اخرجت مسلسلات طويلة على 30 حلقة أذكر منها الحيطة المايلة والمقاديف والكلمة الحلوة . واللسان المقطوع ..
×ده عرفناهو البرامج القدمتها شنو ؟
* المجلة الصحية ويتحدث التاريخ وما تنسى انو نشرة الاخبار كانت الساس والراس والاذاعة كانت بتقدم نشرة على رأس كل ساعة
× في حوش الاذاعة قعدنا كتير يا استاذ ايه رايك نمشي سوا التلفريون ونبدا ببداياتك كمدير ؟
* أيوه أنا كنت المدير العام للتلفزيون من سنة 82 إلى85
×صحي جواب اعفائك من الرئيس جعفر نميري جاك من ضمن اخبار نشرة كان مفروض تقراها انت شخصيا ؟
* ها ها ها ها ها ها ها ها ها ها ها ها ..
×بتضحك ليه ؟
* كلام يضحك ويموت من الضحك والحقيقة يا رجل انني اخذت اجازتي النهائية في مارس 85 وبرغبتي في المعاش الاختياري يعني نزلت معاش .. ومافي زول شالني ..
×في وشك يا محمد طاهر وسامة مخلوطة بي صرامة ؟
*شوف انا بطبعي وطبيعتي حاد جدا ومنضبط شديد الابيض ابيض والاسود اسود أنا ضد اللولوة والخمج وعشان كده كانوا بسموني عسكري الاذاعة..
×وبرضو قالوا انك بتعمل احتياطي للاحتياطي؟
*كيف يعني؟
× يعني عندك 2 لستك اسبير و 2 عفريتة و 2 صرف صحي في البيت وكل الحاجات كده ؟
* ده بالتحديد الحاصل وده سياستي الخارجية والداخلية.
× بمناسبة سياستك الخارجية هل نلت كورسات خارجية ؟
* كتير أهمها في اذاعة صوت العرب وكورس آخر المانيا
× یا زول نسيت حاجة مهمة قالوا رئاسة الجمهورية عرفت انو في عناصر مناوئة بتطلع قرارات الرئيس نميري من لقاء المكاشفة الذي يقدمه التلفريون .. قبل بث البرنامج ؟
* یا زول انت بتجيب الكلام ده من وين والحقيقة يا سيدي انو الرئيس نميري كان يسجل لقاء المكاشفة صباحاً واللقاء يذاع مساءاً ولم تكن هناك جماعات مناوئة ولا حاجة كل المسألة كانت مجرد تسريبات لا حول لها ولا قوة ..
×انا متخيلك زول شاطر في المطبخ كلامي ده يا استاذ صاح؟
* أنا شاطر جدا في سلق البيض وبس ..
×وبرضو انت کورجی یا استاذ مش كده ؟
* الكورة دي خليتا ليك وللمعاك عليك الله اخجلوا من الدافوري بتاعكم ده.
×في تقديري الشخصي ان محمد خوجلي صالحين وحمدي بدري الدين وماجد سرحان هم افضل الاصوات الاذاعية عندك اضافة ؟
*کیف ده كلامك عبد الرحمن زياد وعلى الجانب النسائي سهام المغربي يرحمها الله.
× بيني وبينك وما حاكلم زول افضل مذيع الأمس ام مذيع اليوم؟
* مذيع اليوم عندو المعينات والتأهيل ومذيع امبارح موهوب ولقى فرص التدريب ولكل زهرة عبيرها .. وكل زمن برجاله ..
×ولو محمد طاهر ده ما كان مذيع كان حيكون شنو؟
*كان حيكون مذيع ..مذيع ..مذيع .. بسبق الاصرار والترصد ..
×يا استاذ يا جليل يا استاذ يا قدير يا استاذ يا مدير يا استاذ يا جميل يا رائع يا نبيل انا شاكر ليك كثير..كثير ومع السلامة ؟
*شكرا ليك انت يا استاذ شجرابي مع تحياتي لاسرة وقراء المستقلة.. وكل عام وأنتم بخير ..

Jamal Kinany

صحيفة العهد اونلاين الإلكترونية جامعة لكل السودانيين تجدون فيها الرأي والرأي الآخر عبر منصات الأخبار والاقتصاد والرياضة والثقافة والفنون وقضايا المجتمع السوداني المتنوع والمتعدد

مقالات ذات صلة

زر الذهاب إلى الأعلى