عبدالمنعم شجرابي يكتب بالقديم ولا الجديد
عبدالمنعم شجرابي يكتب بالقديم ولا الجديد
*** الزي الموحد للجهات الحكومية التي تتعامل مع الجمهور مطلوب وليت دخول طالب المعاملة ( غير مهندم ) إلى مكاتب تلك الجهات ( ممنوع ممنوع ممنوع )
*** ( زعل ) المريخاب الشديد بخسارة الدوري يزيد من فرح ( أهلنا ) به وطبيعي فالهلال ( مصنع الفرح ) كلما انتج يقول أهله ( هل من مزيد )؟!
*** أحرز هدفه في توتي بعد ساعات من تجديد عقده ولا أدري هل يحسب لمحمد عبدالرحمن الغربال هدفه هذا ( بالقديم ولا الجديد )
*** نتيجة مباراته أمام هلال الساحل هبطت بالخرطوم الهابط إلى ( هبوط آخر ) ووا أسفاي على الخرطوم مكان الرئيس ينوم والطيارة تقوم
*** ( المستحيل ) وفي نفس الوقت ( الساهل شديد ) هو توجه وفد مريخي لتهنئة الهلال بالكأس ليسمع منه ( العاقبة عندكم في المسرات )
*** لا أسال عن أسباب غياب قادة الإتحاد العام في تسليم الكأس للهلال وفقط أسأل أين أعضاء الإتحاد ( المحترمين ) ؟؟
*** نعم فقده كبير ولكن حيدوب النهود قادر على تعويض كردفان خسارة الهلال وقولوا يارب يكون الفلاح رفيقاً للأمل والأهلي شندي لزيادة فرق نهر النيل
*** نفسي أسأل الجديد شنو في لجنة تطبيع المريخ وحازم ياهو حازم والجاكومي ياهو الجاكومي وسوداكال ( الشايفنو ) بعيد ( قاعد ) قريب
*** الفرق بين الهلال والمريخ ما ثلاثة نقاط … الفارق الأزرق بطل والأحمر وصيف
*** الجميل النبيل أمير عوض هو القلم الوحيد من أقلام المريخ الذي هنأ الهلال وشكراً الأمير أمير و( ياكا أمير عليهم )
*** حوجة الهلال آنياً على وجه السرعة لورشة عمل بعنوان ( الهلال ما قد كان وما سيكون ) ورئيس الهلال ( بالإشارة يفهم )
*** أتعجب ومسؤول إتحاد محلي ملعب إتحاده مسور ( بالخيش ) تؤكل له منصة تتويج بطل الأبطال للمنافسة الأهم والأخطر والأكبر على المستوى القومي ويا ناس الإتحاد العام كفانا مهازل احترموا منافساتكم يحترمكم الناس
*** أغلبية الطلاب المتفوقين في امتحان مرحلة الأساس هلالاب ( أولاد هلالاب ) ولا استغراب فالرباط وثيق بين الهلال والنجاح
*** مسطول نظر وسأل .. الناس ديل متسابقين ليه ؟؟
.. قالوا الأول بيدوهو جايزة
قال طيب الباقين جارين ليه
( النكتة لذيذة يا المريخاب .. مش )
عبدالمنعم شجرابي ..
