عبد المنعم شجرابي يكتب :للسادة الحمير

.. اضرب واهرب ..
للسادة الحمير
* شاعرنا الراحل المقيم محجوب شريف اختصر ( السرقات ) بمقطع جاء فيه
ناس بتسرق ملاية وناس بتسرق ولاية وناس بتسرق خروف السماية
تذكرت المرحوم محجوب مع سرقة نحاسات أعمدة الضغط العالي ومسامير فلنكات خط السكة الحديد .. والجديد سرق كوابل انارة جسر الفتيحاب وقولوا يا لطيف
* واللافت والمثير تسابق ( السلطويين ) هذه الأيام على رجال الطرق الصوفية والإدارات الأهلية ويا ترى هل المسألة عادية و( محبة ) ولا الناس دي ( فوق راي )
* واصل الهلال الانتصارات وجميل انتصاراته في أهداف جاءت من داخل وخارج المنطقة المحرمة وباليمين والشمال ( والشبال )
* مبادرة الجبهة الثورية ( مليانه إنشاء ) و ( مزحومة تعابير ) ومكاونات الجبهة نفسها ( مع وضد ) المبادرة قبل ( رفض وقبول ) الآخرين
* الزول ده ما ظهر منو جديد ولا عندو ليكم جديد .. الزول ده ( كده) وحيظل ( كده ) .. الزول ده ( ياهو ذاتو ) بجديده القديم
* هدأت الأمور الإدارية نوعا بالمريخ وليست المرة الأولى فبعد كل هدوء تأتي العاصفة ( والعاصفة الجد جد ) قادمة من كاس للمريخ في الخريف
* كان الأمس اليوم العالمي للحمير والواجب يفرض علينا تهنئة ( الحمار السوداني ) في كل المواقع وباختلاف ( اللون ) وعيد سعيد ودشليون مبروك ( للسادة الحمير )
* الخرطوم بكل زخمها .. الخرطوم بكل الفيها الخرطوم أو ( الخرتوم ) كما يحلو لأهلي ( أهل العوض ) أكاد لا أصدق أن الفريق الذي يحمل اسهما يقبع في مؤخرة روليت الممتاز ويا ناس الخرطوم ( حصلوا الخرطوم )
* والسؤال هل هناك اتفاق بين ( القونات ) وبعض أصحاب الركشات لإفساد الذوق الفني العام.؟ وإن وجد فهل لا توجد جهة مسؤولة ( تنسف ) هذا الاتفاق ؟!
* في محاولة لتغطية فشله لنقل المباراتين معا نقل التلفزيون شوطا لمباراة الهلال وآخر لمباراة المريخ وشكرا لهذا الفشل الذي عرف المشاهدين أن الأستاذ ابراهيم البزغي هو المدير العام للتلفزيون
عبد المنعم شجرابي ..