عبدالمنعم شجرابي يكتب الدنيا ما دوامة
عبدالمنعم شجرابي يكتب الدنيا ما دوامة
*** لحماية الفرحة .. لحماية أطفالنا الحلوين يتوجب منع استعمالهم للألعاب النارية ( والمفرقعات ) أيام العيد والبلد ما ناقصة ( كفاية البمبان )
*** فوز الهلال ( المتوقع ) بالدوري بيده ( وحلم ) المريخ الفوز به بيد الآخرين وياهو الهلال الأسد الذي ( لا يأكل الميتة )
*** صعب علي رؤية د.سلمى المبارك ونيكولا خارج القصر الرئاسي صعب علي رؤية ( ستات السيادي ) خارج السلطة ( وما دوامة الدنيا ما دوامة )
*** الكرة ( كائن حي ) تتنفس وتتحرك تحب من يحبها وتخلص لمن يخلص لها والشاهد لاعب الخرطوم بدر الدين قلق والذي اقترب من الأربعين ولعب لعدة فرق وما برح وما انفك يجزل العطاء لأنه ( يحبها وتحبه )
*** الزول ده فكر ورجع ( للحتة دي ) .. الزول ده لو بسمع الكلام ما كان غرق في ( الحفرة ) .. الزول ده ما لاقي يد تمرقو .. الزول ده سواها وجاتو عقباها
*** تنادت عطبرة لإنقاذه وليت لاعبي الأمل يكونوا في مستوى التنادي
*** باقة ورد للمسافرين لقضاء العيد في ( الوطن الأصغر ) باقة ورد ندية لمحولي العيد عيدين
*** البرهان غير ( أوراق ) اللعب واحتفظ بالجوكر هذا تعليق الحزب الشيوعي على القرارات الأخيرة وأحسبه تعليق ( تربيزة لذيذ )
*** التطورات بإتحاد الخرطوم مقلقة .. التطورات خطيرة وأخاف أن تلحق كرة الخرطوم ( أمات طه ) أخاف أن تلحق ( الزينين )
*** جلود الأضاحي التي شيدت يوماً بعطبرة قلعة العمال ومصنع الرجال مدرسة ثانوية تقف شامخة هذه الجلود ثروة قومية تقترب الآن من الضياع
*** كثير منها يعاني ( الفلس الشديد ) ولا تندهشوا إن كانت برامج الفضائيات السودانية في عيد الأضحى نفس برامجها في عيد الفطر مع عبارة ( عيد سعيد )
*** بالمناسبة المقلدون ( والقونات ) لا زالوا يسيطرون على الأعراس والصالات ( والما عاجبو يقع البحر )
*** حوار .. شفافية .. أحزاب .. انتخابات .. وفاق .. كلمات ( مستهلكة بس ) ولا مكان لها من الإعراب
عبدالمنعم شجرابي ..
