عمرو سعد،ذكاء الملامسة في التمثيل بجملة واحدة..
عمرو سعد،ذكاء الملامسة في التمثيل بجملة واحدة..
رؤية / هيثم الطيب
+ ليه دايما عمرو سعد بنجح بجد في دراما الصدمة الإنتقالية،وليه دايما عنوان نجاح لأي مسلسل مليان بالمحاصرة ..
الميزة الحقيقية لعمرو سعد كممثل إنو نجح في ربط مهنته كفنان ديكور وكممثل،فاهم إنو التمثيل جماله في الديكورات المرتبطة بيهو،عمرو سعد ناجح لأنو مثقف حقيقي وقاريء صاحب تنوع قرائي،الحاجة دي لامست نقطة مهمة في موهبة التمثيل عندو وهي نقطة ترتيب التلامس مع الناس،كيف تلامس الناس بفكرة ،بجملة ،بحركة تمثيلية،بي تحريك ساكن حلو في جوانيات الناس،وده سبب يجعل كل مسلسلاته طابعها تلامسي،يعني المواطن بحس إنو عمرو سعد عايز يتونس معاهو، لانو في كل جملة تمثيلية بعبر يعبر عن النص بالملامسة ودي حاجة أي مخرج شاطر بطلبها من الممثل أو الممثلة باعتبار إنها العلامة المطلوبة..
عمرو سعد دايما بذكاء مهندس الديكور عندو بصمة يضعها بطريقتو الخاصة وتكون هي الإشارة الناجحة،دايما بعرف يلامس الناس بجملة يكررها بوعي وضبط وبشكل مناسب هنا وهناك،العبارة دي بتكون خلاصة حقيقية كل الشعب بشتغل بيها لانها عبارة الزمن بجد..
في مسلسل (ملوك الجدعنة) ، كان عندو عبارة (الطموح حلو)،حاجة مرتبطة بوضع مادي يخصه لكن برضو بلامس الناس وهي شايفة هو شغال معافرة هنا وهناك وكل ما يقع برضو بقول (الطموح حلو)،عبارة زي دي تصنع ارتباط وجداني بين المسلسل والشعب بتاع الطبقة الشغالة معافرة وهو منها،طبقة كل البيت شغال معافرة وبرضو المعيشة تطحن فيهو بس مليان بي طموح بعضهم بشوفو مقتول وبس،ونجحت العبارة في أنها تكون العلامة الحقيقية في تماسك المسلسل ودرجاته كلها..
في رمضان السنة دي اشتغل بنفس الفكرة وعمل عبارة مناسبة لتحليق الإنجاز الشخصي كمتحرك في جوانيات أي إنسان ،كلمة زي كلمة (عااالمي)وهو بقولها بعد كل حركة إنجاز تطلع منو،فيها شطارة إخراج لأنها بتدخل المسلسل في مزاج طبقة شعبية معينة،ممكن تحب زي شخصية عمرو سعد في تمثيل شخصية (توبة) الشاب الطالع من جو مكهرب بالحاجات الغلط بس بطلع منها بشكل الشاب الشاطر في كل شغل،ودي إشارة التماسك مع الناس والشعب في طبقة اجتماعية معينة عايزة تقاوم وتقع وتقوم وتنتصر وده شغل (توبة) في المسلسل وسر نجاحه..
عمرو سعد،ممثل إشارات كلامية وشاطر فيها جدا وذكي للغاية في تفسيراتها وتحريكها، وأي نص مكتوب بلغة وانت كمخرج عايزها تلامس الناس بدرجات معينة طوالي اطلع بي عمرو سعد لانو مقدرات ذكاء الممثل فيهو كلها هنا،ذكي في تفسيرات العبارات بالتنغيمات الصوتية وبعرف يعمل جملة تكون هي فكرة المسلسل كله وتصبح عبارة شعبية متحركة بين الناس وتربطهم بالمسلسل وده النجاح كما يجب أن يكون..
