د . حسن التجاني يكتب | وهج الكلم | لو كنت البرهان…!!
البرهان رئيس موفق جدا…وفي لغة العسكر بيقولوا عليه (مالي قاشه)….كعسكري تعداه العيب…والعسكرية عاوزه الزول يكون زول شفت وذكي و(لعاب)…لان السياسيين ما بقدر عليهم الا زول بمواصفات البرهان …يوديهم البحر ويجيبهم عطاشه ويقسم انه وداهم البحر وجابهم …لكن سقاهم ما سقاهم لو كانت مهمته السقاية قانون واحد بحاصره مافي…
* لو كنت البرهان لتوضيت جيدا وصليت ركعتين لله شكرا وحمدا علي ما هو فيه من نعم لا تحصي ولا تعد….
* ولو كنت مكان البرهان لتحركت تحركات ماكوكية لاجل حسم معركة الكرامة ولملمت كل الجيش والشعب السوداني والمشتركة والمستنفريين وداهمت مرة واحدة دارفور كلها وكردفانات ونضفت ارض السودان من دنس المليشيا واعلنت النصر.
* لو كنت البرهان ..اعود بعد النصر برضا جماهيري وقبول اقليمي ودولي غير محدود…واعلن اني المشير بقوات الشعب المسلحة عبد الفتاح البرهان …واعلن فترة انتقالية مدتها (٣) اعوام فقط اكون رئيسا لها ثم اكون حكومة من وزراء اصحاب خبرات اقوياء نزيهين و(حواء والدة)..مع دمج بعض الوزارات في وزارات اخري اري ان ليس الان وقتها او اهميتها …واركز علي الوزارات الخدمية الايرادية
و مافي حاجة اسمها وكلاء ونائب ومدير عام والكلام الماعنده لزوم ده …اركز علي المالية وايرادات كل الاطراف لها بمراجعيين اقوياء اكفأ يخافون الله في خلقه.
* لو كنت المشير ركن عبد الفتاح الرئيس صاحب كل السلطات لكونت لجنة خماسية تقوم بمهام مجلس الشعب ولديها سلطات واسعة لمراقبة العمل الحكومي وهي عين المشير التي يري بها كل شئ….شرط ان يكونوا (نقاوة غير خائبة)…
* لو كنت البرهان الرئيس لفعلت قوانيين الطواري و الردع والعقوبات التي تكون ذات حسم مباشر باخذ موافقة الشعب في تنفيذ عقوباتها علي كل الفاسدين وكل من يخرج عن الضوابط القانونية التي تصل عقوبتها الاعدام والصلب لكل متلاعب بقوت الشعب وحقوقه وممتلكاته .
* البرهان له قبول عالي جدا لو شاور الشعب علي ان يجلده لوافق الشعب …وقدم سوط الجلد هدية لجلده …خاصة لو حسم له هزيمة المليشيا التي مرارتها كالحنظل في حلق كل مواطن سوداني حر.
* عليه ان يدفع كل المال الخاص بتوفير الكهرباء والمياه فورا لتوفير اهم خدمتين للحياة والاستقرار….توفير الامن علي مدار الساعة والدقيقة دون تلكؤ وسيولة .
* التركيز علي سفلتة الطرق وتعمير الكباري وصيانتها واعفاء المواطنيين من ضغوط الرسوم الكثيرة التي اثقلت كاهلهم وارهقتهم …بل مساعدة التجار وتقديم لهم التسهيلات وحسم الفوضي لديهم بتقديم كل من يتجاوز المنطق والمقبول ….(لتسويته) عشان يكون عظة وعبرة لمن لا يعتبر منهم.
* لو كنت البرهان لاغلقت كل حدود السودان …وركزت علي الوجود الاجنبي بالبلاد وقفلت ملفه نهائيا… نملة اجنبية لا يمكن ان تدخل السودان متسللة دون استيفائها الضوابط الشرعية المعمول بها بكل العالم في المهام الهجرية.
* لو كنت البرهان لعملت علي اصدار قرار انهاءالتجريف بالقوات النظامية والغاء ما يعرف بكشوفات الصالح العام نهائيا الا باكمال السن المعاشية او مخالفات واضحة تتطلب الحسم بقانون ذات القوات بالفصل من الخدمة ….ده قانون غير عادل كيف تشيل ضباط كفاءات لاغراض واهمة بسبب اتهام توجه سياسي طالما الضابط سوداني اصيل ويؤدس واجبه كما هو مطلوب… بلا شك سيتحول لك معارض وانت من اجبرته لذلك ..الا من رحم ربي فيهم.
* لو كنت البرهان لاصدرت قرارات صارمة بشأن تقوية الجيش الواحد القومي المكون من كل ابناء السودان قاطبة والغيت اي تكوينات لقوات نظامية اخري جانبية …لتكوين جيش واحد قومي يعرف بجيش السودان …مدرب مؤهل معافي سليم .
* سطر فوق العادة :
انا عارف ما ببقي البرهان …لكن امنيات لصالح البرهان والبلاد ليتها تتحقق برغبة ومحبة البرهان بما نكتب له والبلاد.
(ان قدر لنا نعود)
