محمد علي التوم من الله يكتب | (مفاكهات) الكسره يااشهى الطعام

مكتول هواك انا من زمان
الكسره يا اكل الملوك
عملتي للتقليه شان
والخدره فيك عقد الجمان

والباميه لمن تلتقيك
عاد ما حلاة الوجبه ديك
صينيه عزفا منفرد
صينيه ما بتقبل شريك

يالكسرة يا ست الرغيف
من غيرك انا قلبي بيقيف
حابيك انا من زمان
حبي ليك ما ليهو قيف

بالرجله هم بتخاتفوك
لو قلت تهرب منهم
في ثانيه بجرو بحصلوك
ما الوجبة اشهى من العسل
ولحمة فرن بي عنبلوق

بملاح ورق امرك عجيب
تاكل واصلك ما بتقيف
لامن تكسر العنقريب
وان قالو ليك نجيب زيادة
تقول نجيب لازم نجيب

واقول وكلامي جد
الكسره بي ملاح القرع
شيتا رهيب ماليهو حد
بالشطة لمن تنعجن
ارخي الحزام ما تشدو شد

الكسره اصيله و من بلدنا
والرغيف بالجد هلكنا
مكن الدولار ملكنا
مرمطنا زيين بالهم ربطنا

يا حليل حبوباتنا الزمان
واماتنا يا رمز الحنان
مافيش جوع مافيش غلا
اديتن البلد الامان

زمن المخابز كانت قليلة
زمن الكسار زمن العصيده
زمن الفراصة في الصباح
والدخن العجيب في كل ليلة

انتشرت فينا الكافتيريا ت
هوت دوق وببرقر ومشويات
واكلات وافدة من كل الدول
غرق الجنيه ومن بدري مات

يابنات حواء اسمعني مرة
عواسة الكسره عزه ومسره
وبيكن بيقوى الاقتصاد
علشان تعيش دولتنا حره

عدد المخابز كم في بلدنا
تكلفة المخابز كم لوسالنا
ياخواناحقو نرجع لي اصلنا
قبال نقول الروووووب
خلاص هلكنا

محمد علي التوم من الله
25/6/2026

حكم