عبدالمنعم شجرابي يكتب : لوح تلج

.. اضرب واهرب ..
عبدالمنعم شجرابي يكتب : لوح تلج

* تباشير الشتاء ليست في استقرار التيار الكهربائي ولا ( الضل الرمى ) .. تباشير الشتاء في الانخفاض الملحوظ في أسعار الخضار والوفرة التي جعلت البائع ( يحنس ) واللهم زد وبارك

* فترة طويلة وأحداث المريخ الإدارية على ( نار ذات لهب ) لتبدأ إجراءات الانتخابات على ( لوح تلج ) ولا دهشة طالما كل شئ بالمريخ يدعو للدهشة

* لتجهيز الملاعب لسيكافا استلف الاتحاد العام من الهلال دواليب اللاعبين ودكة البدلاء لاستاد كوبر وبطيب خاطر منحها له .. الاتحاد ( بشطارة غبية ) فكر وقدر ثم فكر وقدر ( وقرب يعمل نايم ) بالدكة والدواليب وعيب عيب كده يا اتحاد

( رجع الدين وخليك أمين )
* من موقعه السيادي ( ساط وجاط ) و( شخبط ولخبط ) أبوالقاسم برطم عضو المجلس السيادي السابق أين هو الآن؟؟

مجرد سؤال
* باب واحد احتاج محمد سيد أحمد الجاكومي لكسره ولو كانت هناك أبواب أخرى ( تستحق الكسر ) باستاد المريخ لكسرها فالجاكومي ( ما بهابي ) وهذا مني للاعتماد

* هلالها يلاقي المريخ وعربها يلاقي الهلال وفي لقاء ( من خلاف ) تواجه بورتسودان الخرطوم .. ومن مجموعة الست نقاط للمباراتين يتوقع المراقبون فوز الهلالان بأربعة نقاط ( وكده )

* في الساحة السياسية قادة سياسيون بلا ( حفنة من الجماهير ) ولا مش كده يا إشراقة سيد محمود وأبوقردة ؟؟

* يتمنى ويتمنى ومن حق حي العرب تمني الفوز على الهلال طالما سبقته إيران بتمني الفوز على إنجلترا والحياة أساسها ( الأماني )

* الزول ده يضيع الفرصة ورا الفرصة بعد الفرصة الزول ده مصر يقيف (في الحتة دي ) وإن رجع ورا ما بمشي قدام ( الزول ده ما زول )

* مرة بتكتب بقلم ( القحاتة ) ومرة بقلم ( الكيزان ) وأمبارح ظهرت ( اتحادي ) عليك الله انت مع منو؟؟ على صاحب الرسالة الظريفة أقول أنا لا إلى هؤلاء ولا إلى هؤلاء ولا إلى أولئك أنا لست حزبي وفي

تعريفي بالمعتقل عرفت بالوطني
أنا سوداني
أنا وطني ( وبس )
عبدالمنعم شجرابي ..