عبدالمنعم شجرابي يكتب : قطر عطبرة

.. اضرب واهرب ..
قطر عطبرة
*** لماذا الجيش السوداني وحده من دون جيوش العالم الراغب في الحكم ؟؟ لماذا وحده الجاد في الإنقلابات ؟؟ ولماذا يبقى السياسي السوداني وإلى الممات قيادياً لا يستقيل ولا يقال .. ولا حتى يختار المعاش ؟؟ لماذا لماذا ؟؟
*** المقاعد ( تقول ياليل ) المضمار ( زي الضمائر ) والأرضيات ( تلمع ) والحيطان ( ترقش ) وحلم ( حنبنيهو البنحلم بيهو يوماتي ) حققه أهل الهلال في الجوهرة الزرقاء ويا سلام يا سلام
*** 76 ألف دولار منحة من الجامعة العربية للسودان مساعدة في النزوح الأثيوبي شخصياً تصورت أنني قرأت الرقم ( غلط ) لكني وجدته ( كدا وايوا كدا ) ولا حول ولا قوة إلا بالله
*** باقة ورد للصيادلة باقة ورد للذين يقدمون الدواء المعدوم ( من تحت الأرض ) ويوفرون العلاج
*** يتوجب علي أن أذّكر السيد محمد سيد أحمد أنه نائب رئيس نادي المريخ يتوجب علي أن أذكره أنه من نفر حرّض الإنقلابيين على الإنقلاب ويا صديقي الجاكومي كان انت نسيت أنا ما نسيت
*** بالمناسبة رئيس نادي المريخ حازم ( جناح حازم ) يوزع صوره وهو ياكل ويجتمع ويصلي ويسدد المال وهو صاحي ونايم واوعك زول يقول ليك الراجل ده بيحب ( الفلاشات )
*** تشويه وتدمير يمارس عمداً في أغنيات الحقيبة من الفنانين الشباب والقونات وكل شئ إلا أغنيات حقيبة الفن الخالدة التي أثرت وجدان إنسان السودان
*** الزول ده ( يتشابى ) بلا قدرات .. الزول ده يتحدث بلا قرار .. الزول ( ينفخ ) ساكت الزول ده ( هبوب ) وعامل فيها ( ابوعرام )
*** لا شئ ( سري ) وبالمقابل فالتأليف على الواتساب ( عمرو قصير ) والكذابون الذين يرمون الناس بهتاناً تفضحهم أكاذيبهم قبل أن يفضحهم الناس
*** عدم وصول الزيادات في المرتبات ما مشكلة المشكلة يا جبريل إبراهيم في عدم وصول مرتبات يناير إلى الآن
*** جميل جداً أن تضبط شرطة نهر النيل 3 ألف راس بنقو والجميل والأجمل هذا التدافق على علاج الإدمان
*** عبد الباسط حمزة لم يبرأ وجدي صالح ولجنة إزالة التمكين وحسب عبد الباسط أدان آخرين .. مش كده يا الصحفي الرقم عبدالماجد عبدالحميد !!!
*** قطر عطبرة مصنع الرجال جاء بالمأكل والمشرب والملبس والوقود قطر عطبرة مصنع الرجال جاء بالإنسان والحيوان قطر عطبرة أم المدائن تميز بالاسم لأنه أتى بالثوار قطر عطبرة الديمقراطية الحرة ( حلال للطير من كل جنس )
عبدالمنعم شجرابي ..