عبدالمنعم شجرابي يكتب: .. اضرب واهرب ..متعدد الأغراض
عبدالمنعم شجرابي يكتب: .. اضرب واهرب ..متعدد الأغراض
ستغل ( المستغلون ) الحرب في ( رفع ) إيجار العقارات واستغلها آخرون في ( تسويد الأسواق ) وآخرون استغلوها في ( تضخيم ) تذاكر السفر وترحيل البضائع أما الغريب والعجيب فكان في ( التسفير ) وعدد الإداريين ( والمؤلفة قلوبهم ) في بعثة المنتخب الوطني بليبيا ضعف عدد اللاعبين
( ولا زالت الفوضى مستمرة )
*** وصلت شخصياً إلى قناعة كاملة ألا رأي لك في وطنك السودان إن لم تكن ( حزبي ) وقناعتي أكبر ألا أكون حزبي والتاريخ يشهد أن الأحزاب مجتمعة فشلت
( ولحقت البلد أمات طه )
*** من داخل سجن كوبر ( انتخبه ) المريخاب رئيساً للمريخ ( بالاجماع السكوتي ) وبعدها انتقدوه واسقطوه والذين أسقطوه كانت حجتهم أقل ( منطقاً ) من حجته في البقاء رئيساً
واللافت أنه لم تحل الفيفا ولا الاتحاد السوداني ولا كاف ولا كاس المشكلة ليبقى سوداكال رئيساً
( ولو كره الكارهون )
*** أديب يبخل بأدبه
مروض حروف يرفض ترويضها
مؤلف يدس أدوات التأليف
كاتب يحرم القراء مقالاته
( وما حأقول ليكم هو منو عشان ما تقولوا لي ده حسن فضل المولى ) ويا جنرال ( عليك الله ) أكتب وانشر ووزع و( بطل بخل ) و( بطل كسل )
*** سألني عن رأيي في محترفي الهلال الأجانب قلت لم أشاهدهم ومعرفتي بمستواهم أقل من معرفتي ( بجراحة المخ والأعصاب )
نسأل الله لهم التوفيق والسداد
*** الزول ده يشرق وقت الغروب
الزول ده يغرب وقت الشروق
الزول ده يختار اليسار وقت اليمين ويختار اليمين وقت اليسار الزول ده وقفوه ( واظبطوه ) جائز يكون مفيد
*** الزميل العزيز ود الشريف ( شكراً جزيلاً ) وأنت
تكتب عن المريخ الغائب ( وشكراً حزيناً ) وأنت تكتب عن الهلال ( بالفيهو والما فيهو ) ولا شكر لك ( على الواجب ) وانت ( تضرب ) الإتحاد العام ( الميت ) والضرب على الميت حرام
*** كان متنزه .. كان ملعب للمشاة .. كان معهد تخسيس .. كان حوض يقفز من فوقه السباحون .. كان ملتقى للأحباب وقبله للعشاق .. كان خط إمداد بين مدينتين ..
كان كل هذا وذاك كان ( متعدد الأغراض ) قبل أن يكون ( جسراً للسيارات ) وخبر تدمير كبري شمبات نزل صاعقة على عباد الله .. إنها الحرب
( ولاحول ولا قوة إلا بالله )
عبدالمنعم شجرابي ..
