مسرحية (صرفة صندوق)،كيف وكيف
مسرحية (صرفة صندوق)،كيف وكيف
رؤية / هيثم الطيب
+ الممثل /حسن يوسف واحد من الممثلين الشاطرين جداً في ملامح (كوميديا الإشارة)،وهي كوميديا العبارة القصيرة والتعبير الانفعالي بتفاصيل الوجه المختلفة والمتحرك سريعاً لتوظيف عبارة وموقف ولحظة،صعوبة النوع ده من الكوميديا إنو عايز ممثل يستطيع بسرعة يعمل ربط كلمة وانفعال مليان كوميديا،وبسرعة كمان يمشي لنقطة تانية في النص وبرضو يشتغل عليها بنفس الفكرة،دي عايزة لياقة كوميدية وتدريب وتجريب حقيقي نظري وعملي،عشان هي أصلا نوع كوميديا معتمدة على لحظة كوميدية فاصلة صغيرة وتاني لحظة كوميدية فيها تعابير انفعالية متجددة في ملامح الوجه ومتنقلة بسرعة النص والحوارات وده بعمل الربط الذهني المطلوب بين الممثل والجمهور،ربط يتحقق فيهو بعد نفسي وتراكمي تكون المحصلة فيهو (الجمهور مركز معاه كممثل،حتى الفاصلة هي ملمح جاذب ومحرك حالة قادمة)..
صعوبة النوع ده من الكوميديا إنو عايز نص ذكي بعبارات قصيرة ورسم مخرج فنان ودارس وشاطر في توظيف العبارة القصيرة دي مع امكانيات الممثل الكوميدية الانفعالية وتحريكها بسرعة هنا وهناك..
حاليا الممثل حسن يوسف مع المؤلف والمخرج /محمد البحر ومجموعة مميزة عندهم مسرحية (صرفة صندوق) وهي حكاية مكتوبة بشوف لأوضاع بلدنا وتشريحها وتوصيفها ومناقشة ليها مع الناس في إشارات كوميدية..
تجربة سودانية ننتظرها،عشان نشوف عمل مختلف فيهو شغل حسن يوسف الكوميدي والبقية الجميلة،ونحلم برؤية جديدة لمسرح سوداني بمشي في مسارات نص ذكي وممثل حقيقي ومخرج بعرف يشتغل على مقدرات الممثلين ويوظفها بالطريقة الصاح في الزمن الكوميدي الصاح داخل المسرحية،لانو الكوميديا زمن متحرك داخل المسرح ومن هنا ندخل كلنا..
