الفنانة: شادن محمدحسين للعهد اونلاين :إيمـــــاني بالمخــــزون التــــراثي .. هـــو ما جعلــــني منقـــبة عنـــه فـــي شتـــى السودان

الفنانة: شادن محمدحسين للعهد اونلاين

إيمـــــاني بالمخــــزون التــــراثي .. هـــو ما جعلــــني منقـــبة عنـــه فـــي شتـــى السودان

نقف عند مبدعة تقدم ابداعاتها بطريقة لا تحتاج لتفسير لانها مبدعة ذات تجربة ساحرة ومحتشدة بكل معاني الجمال والروعة والإبداع؛ صوت قادم من خلف التقاطيع يحمل بين طياته تراث بلدي ويعتمد على إمكانيات ذاتية وتؤكد أنها سليلة الإبداع تربية، وتلقين ودراسة؛ فنانة تجمع بين التميز الإبداعي وتخصصت في تلك الأعمال التي قدمتها ماجعلها أميز بنات جيلها؛ إنها الفنانة شادن محمد حسين، فهي فنانة مختلفه في ضروب وأنواع وشكل الإبداع واستطاعت ان تضع بصمتها التي نعرفها بها؛ من خلال أي أغنية تفسر عند الأداء وطريقة العرض الفلكلوري المعروف؛ فشادن مستودع الإبداع، كتبت اسمها كبيراً في الساحة بكل احترافيه فصوتها يملأ كون المتلقين بكل ماهو مدهش وجاذب، فكونت جمهور عريض يهتم ويتابع ماتقدمه، وزرعت في قلوبنا إبداعاتها التي تنمو في وجداننا وتفرهد ورود، ويفوح عطر صوتها في كل بقاع يدخله، فمادخل هذا الصوت مكاناً إلا وتراقصت في حضرته الأشجان، شادن فنانة نعتمدها إضافة حقيقة لساحة الغناء، لأنها اتخذت من التفرد والاختلاف والتميز طريقاً، على أسس كل الجمال، شقت طريقها فكانت الأكثر حضوراً ولنقف على هذا المشوار والتجربة العميقة والمتميزة أجرينا معها هذا الحوار وقلبنا معها كتابها الفني، صوتها غلافه واداءها فهرسه، وابوابه محتواه الذي يشبه خريطة السودان.
الخرطوم: رمزي حسن و إبراهيم عبد الرحيم

البطاقة الشخصية؟
أنا شادن محمد حسين من مواليد مدينة الابيض؛ درست الأساس في مدرسة الشيماء الاساسية النموذجية و مدرسة السيد علي الميرغني الثانوية، درست في الجامعة الاهلية اقتصاد وعلوم ادارية تخصص بنوك وتأمين وباحثة في ايقاعات الأبالة البقارة الجبالة مع الافركان بيتز ومهتمه بقضايا المرأه وقضايا السلام المجتمعى والتعايش السلمى الدينى والتعايش العرقي ومهتمة جدآ لأمر المناطق في السودان ويهمني جداً امرها، وبعدين لمن اقول باحثة في ايقاعات الابالة البقاره والجبالة والغنامة مافي منطقة محصورة على كل مناطق السودان يعني اي زول عندو سعية قاعد في البادية هو زول قادر يطلع طاقة فنية فطرية جذابة وجميلة جدآ بتستحق الاهتمام والتقدير وبتستحق الناس تعمل فيها ايقاعات و دراسات بتستحق الناس تعمل فيها تنقيب وتسليط الضوء.
حدثينا عن اهتمامك بالتراث وهل محصور على منطقة واحدة ام على كل تراث السودان ؟
اهتمامي بالتراث لانو لمن تقول تراث او موروث معناها دا اصلك، واصل السودان واصل بلدك فالاهتمام بتفاصيل الهوية السودانية من خلال الفنون هو جزء كبير جدآ من تعريف الناس، يعني نعرف الناس بالثقافات المتباينة بالموروث الفخم والعظيم لكل مناطق السودان، انا ابتديت ببلدي لانو دي اكتر ثقافة انا اتربيت ونشأة فيها وهي ذاته فيها تباين عرقي ما معقول مدهش يعني القبائل الموجودة في كردفان ودارفور هي ممكن تكون قبائل كل السودان، ولكن الاهتمام الاول والكبير كان للفكرة دي لانو انا عندي طرح اسمو نشر ثقافة السلام في الأماكن المتضررة في كردفان ودارفور لانو عشنا نزاعات وشفنا ويلات حروب لذلك دايرين نخلي صوتنا عالي من خلال الثقافة ونناشد الدولة والمواطنين بحث الناس بالاحساس بالكيان دا، يعني انو نحنا كبلد لازم نعرف قضايا بعض عشان نقدر ندعمها.
يعني لو ما عرفنا الناس، والناس عرفت انو المنطقة الفلانية فيها ياتو نوع من الخلافات وياتو نوع من الحروب والتشتت والخراب الحاصل في البلد ما بتجي دعومات حتى ناس الوطن الواحد بكونو ما عندهم خلفية عن المنطقة او الجغرافيا المعينة فبالتالي نحنا بنسلط الضوء والاهم انو يكون في مناطقنا في سلام عشان كدا انا ابتديت بالفكرة بتاعت المنطقة الانا فيها ولكن الثقافات الموجودة هناك ثقافات ثرة وكبيرة حتي ولو انا بقيت خمسين شادن ما حنقدر نطلع ولو الجزء البسيط من الثقافات الموجودة، هي ثقافة مدهشة مفروض تكون مفهومة ومعروفة و دي الحاجات الانا بحب بقدر الإمكان اوصلها للناس وعندي الاستعداد الكامل انو اي بلد في السودان شمال جنوب شرق غرب أعرف عن المنطقة واعرف عن موروثها واعرف القضايا وكل الغنا الانا بقدمو رسالي وعندو مضامينوالبتتكلم عن المشكلة المعينة في البلد اكيد كل السودان ولكن انا ابتديت بمنطقتي الاكثر فيها معرفة وعايشه فيها.
_ ارتبطت تجربتك بالفن التراثي الاستعراضي ما سر ذالك ؟
ارتباط التجربة بالاستعراض، السر انو ببساطة انا بنقل نفس الثقافة الموجودة هناك بكل تفاصيلها يعني هناك ما عندنا غنا ما استعراضي على اي حال حتى لو ادقت نقارة الرقيص بتاعها، حيكون في حركة في شوف ولو دقينا كرن في شوف ولو اشتغلنا اي شغل اي كان وأي كانت المادة التراثية و للموروث المعين لازم فيهو لوحة استعراضية، وانا عشان اكون زولة أمينة واكون زولة حقيقية بنقل في ثقافة حقيقية لازم انا انقل الكلام دا بكل التفاصيل يعني لو ما ضفت ما انقص من الفكرة الأساسية، ودي واحدة من الحاجات الانا متمسكة بيها جداً الشكل الاستعراضي لانو بوريك شعورهم بمزيكتهم بغناهم بفكرتهم.
_ اين انت من المشاركات الخارجية ؟
انا بفتكر انو المشروع دا الفكرة الاساسية فيهو انو يبقي عالمي فالمشاركات الخارجية الآن للاسف الشديد حتى المناطق على مستوى مناطق العالم الانا لفيتها ما جاتني دعوة من وزارة ثقافة ولا سياحة ولا مشيت عن طريق ومشي الجاليات ذاتو ضعيف جدآ يعني دايمآ انا البكون لي السبق في الحاجه دي ودايما انا البكون داير اكوس المهرجانات وكدا لكن بفتكر انو وزارة الثقافه ذاتها ممكن تفهم انو ثقافة الموروث دي والمعتقد والثقافة المادية يعني هي دي مسؤوليتها، وهي البتروج ليها عالمياً و حتفتح لينا الابواب لنشارك عالميآ وكدا اذا دا حصل، واذا ما حصل نحنا بطريقتنا برانا بنقدر نشيل مادة سودانية نحنا فخورين بيها جداً يعني عندنا الشيء البخلينا نصل للعالم ببساطة شديدة ووصلنا الحمد لله في المشروع السوداني لمرحلة متقدمة، لأنو ثقافتنا السودانينة عظيمة و محترمة و التسويق ليها حييكون عالمي ودا السوق المعين البقدر يقيم موروثات الدول، افتكر كدا لانو هنا حتى مافي محافل نادراً ما يحتفو بالفكرة بتاعت التراث ماشين على الجو المودري، وهو ذاتو التراث ممكن يبقي اي موروث قديم لكن مودري و على فكرة كل الغنا الانا قاعده أغنيهو – بس في فكرة سيئة جداً مغلوطة تمامآ شادن بتغني تراث – لا نحنا بنكتب ونلحن مع مجاراة اللحن الفطري الجوانا الاحساس الجوانا الفطري هوي دا ما غنا تراث دا غنا حديث دا مكتوب يعني انا الكاتبة والملحنة يعني مثلا الناس الاتعاملو معاي يبقي دا اسمو غنا جديد غنا خاص ولكن هوقاعد يجاري في المود يجاري الثقافة المعينه يعني انا مثلا كتبت بعرب جوبا ولحنت بالاسطايل الجنوبي تمامآ دا ما اقدر اسميهو تراث لكن المفهوم بتاع التراث، التراث دايما الحاجه المرت عليها دهور متوارث توارثناها نحنا كانت حقة حبوبة وحقة جد جدي وحبوبة حبوبتي دا بنسميهو تراث ولكن الغنا الهسي بتكتب دا لانو انا موجودة متوفرة في الطبيعة متربية عليها حتى الالحان البتتصدر لذاكرتي كلها بتكون الحان ذات المكان و بعد داك ببقي الزول قاعد يطلع في الطاقة دي عشان نقدمها للناس.
شعراء تعاملت معهم ؟ بكل الحب وكل الامتنان بشكر الظروف الجاتني اقابل الشعراء والخلتم يكون عندهم ايمان بتجربتي او مشروعي ويدوني غناء وانا اكون قادرة اني اقدمو يعني يكون عندو وجود في الساحة الفنية بشكرهم جدآ جدآ وممتنه ولله انا بشكر اي زول من خلال الحوار دا، اي زول وقف معاي في مشروعي مهما كانت وقفتك انت عزيز وغالي وقدمتا لي وبشكرك جدآ جدآ وان شاء لله انا اكون قدر المسؤولية البتخليني اقيف قدام نفسي كدا واقول انا مشروع ناضج واثق يعني اهتم بتسليط الضوء لمناطق يمكن الفنون وجودها في الجغرافيا المعينة سر ولكن عندنا في الاعلام ممكن يكون فيهو ندره وان شاء لله ربنا يقدرنا نغني كل حاجاتنا المحلية وكل غنا المناطق يثري الساحة الفنية. ما هو الدافع الريئسي لميولك لهذا التراث ؟
الدافع و الميول لاني انا اشتغل تراث باللهجة و بالطريقة دي بهتما بالموضوع دا لاني انا بت البيئة دي انا زوله كردفانية دارفورية الاصل اهلي نصهم في كردفان والنص التاني في دارفور اتربيت في البيئة دي وانا حكامة ولي الفخر اشيل الاسم دا عن اهلي وعن القبائل الانا منتمية ليها وبالنسبة لمفهوم الحكامة بتتقال انها هي حكامة يعني ذي فكرة الفنان الهنا المكتمل بس دا ثلاثي الابعاد ودا ممكن يكون مؤدي او بتعامل مع شعراء وكدا وانا لانو اتربيت هناك فدايما شعورك ما بقدر يطلع الا الحاجة الهو معتاد عليها في السلوك المفردات الالحان القضايا والمواضيع الفي البيئة.
_ لماذا تخصصتي في لونية معينه من الغناء ؟
ارتباطي باللونية دي لانو دي بئتي والزول بعبر عن بيئتو وبعبر بالطريقة النشأ عليها و اتعود عليها، وكما ما يسمعه يخزنه في ذاكرتو، وتجربة التلحين زي ما قلت انو الحكامة دي هي فنان ثلاثية الابعاد يعني بتكتب وبتلحن وبتغني، يعني الحمد لله انا بكتب وبلحن وبغني الموضوع دا كلو فطري من غير اي دراسة، بالفطرة، دي حاجه ورثناها من اهلنا فحتى الغنا كتبت بمفردة الوسط ولحنتا وتغنو لي فنانين في الوسط وغنا اتخزن في الذاكرة لوجودنا في المدن وكدا فنعم لحنت؟
_ عدد اعمالك الخاصة ؟
عدد الاعمال الانا بقدر اقولها 64 عمل ملحن وجزء منهما كبير جدا زي كم و30 كلماتي والحاني وباقي الاغنيات كلمات شعراء وملحنين احترمهم جدآ واقدرهم جدآ ولسه في شعراء بيدوني في غنا و في ملحنين بلحنو ماشين في المد وان شاء لله انا والشعراء والملحنين نقدم لثقافة البلد الجميل حاجة ترفع الراس وتقيمنا وتخلينا نحنا الجانب المشرق للفن السوداني ؟
_ كيف ترى ان الابداع يساعد في توحيد وجدان الشعب السوداني؟
نعم الابداع يوحد وجدان الشعب السوداني، اكيد طول مافي بلد موجود فيهو التباين العرقي والثقافي دا لازم نكون فخورين بالاختلاف والتنوع، يعني التنوع الارقي وبالتالي الثقافي بخلي عندنا ذخيرة سرة من الغنا الفخم من الثقافة البتمثلنا شمالآ وجنوبآ وشرقآ وغربآ بكل الجمال والروعة، فبوحد لانو مثلاً انا الليلة من اكبر معجبين بمحمد النصري و استيفن اور باب وسيدي دوشكا عاشقة جداً لغناهو، يعني انو دا وجدان مكتمل المحبة لكل اطراف البلد دي في غناي ومسيرتي انا لاقيت كمية من الناس الما ليهم علاقة بالثقافة دي حبو الكلام جداً جداً عندي يعني لدي معجبين من مناطق بعيدة جداً من الثقافة، كيف ما بوحد الوجدان فالغنا هو ثقافة لزمان ومكان ومشاعر الناس، موجودين في مكان معين اكيد بشعر بيها كل زول، دا بدخل في احساسنا بانسانيتنا لميولنا لبلدنا، اذا انت ما عندك قدرة تتقبلو كلو كدا مع بعض يبقي انت اصلا عندك اشكالية بتاعة هوية، بالفنون بنقدر نسمو ومن خلال الفنون انا طارحة قضايا دايرين سلام في المناطق دي ولكل مناطق السودان و يشعر بيها كل السودانيين فاكيد بوحد.
_ هل تغنت شادن لشعراء الوسط ؟
طبعا غنيت لشعراء الوسط التجاني حاج موسي وغنيت لحميد لله يرحمو و لمدني النخلي شغالة هسي غنا للموصلي وشعراء موجودين في الوسط اتعاملت معاهم وبكل السعادة وكمان فيصل سعيد وفي شعراء عظيمين جداً جدآ الآن انا قاعدة اتعامل معاهم و يعني ما قادره اقول كم الجمال الموجود واناقه التعامل ورقي المفردة وعمق المضامين حاجة مدهشه وجميلة و بالطريقة دي بنقدر نعمل حاجة متنوعة للمواطن السوداني وانسان السودان البستحق انو نحنا نقدم ليهو الفن بأبهي الصور.
_ رأيك في الساحة الفنية اليوم ؟
في مقبل الايام برتب لحاجات كويسة وكبيره وبتليق بالشعب السوداني؛ اكيد لكن حأفصح عنها ليكم في الزمن المناسب حتى تكون جزء من المشروع إن شاء لله.
_ لماذا انت بعيدة من الاجهزة الاعلامية والبرامج التي تهتم بالاغنيات مثل أغاني و أغاني؟
أول حاجة لمن يكون عندك مشروع هو في البداية توعوي ورسالي يعني تعريفي ببقي عندك سوق في حالة القنوات أو السوشل ميديا، هي مهتمة بأمر الحاجة دي، الان كل القنوات منصرفة تماماً لموضوع غير موضوع الهوية السودانية، لموضوع غير الزول البتكلم يقول لناس الوعي والناس تعمل كدا، لكنهم هم دايرين الاسهل حاجة كدا سريعة يومين تلاته وتختفي مافي مشكلة لكن هم ما حريصين للفكرة دي لانو لو كانوا حريصين كان صممت برامج تدعم الاتجاه دا برامج بتتكلم عن ثقافة الشمال كلها من حلفا برامج تتكلم عن الشرق و الايقاعات بتاعة الناس دي.
هل لك مشروع إبداعي في الخاطر؟ ولله ما لي مشروع، أنا لي مشاريع في الخاطر برضو انا بحب دايما وأبداً الناس تعرف عني الحاجات بعد ما تبقي يعني بحب الحاجة دي جداً وبحب اني اجتهد وارتب حالي واعمل كل الحاجات اللازمة، لكن اتوقعو مني الكثير لانو روح الفنان التمرد موجودة بكثرة ومؤرقة جدآ وحاسه انو انا جواي صوت بقول انو انت في يدك التغيير تغيري بقوم أغير كل السبل التي تليق بالاخلاق و الفن المحترم، ولنا باع طويل ان شاء لله في مقبل الايام. اين انت من الاغنية الوطنية واغنية الحقيبة ؟
يعني الزول لمن يكون عندو تخصص اتخيل لي الجو بتاع الخصوصية دا هو مفيد لانو بخليك تنجض الحاجة الانت ماسكها، غنا الحقيبة بحبو جداً لكن ما حصل مرة جا على بالي أنو انا اغنيه كزولة عايزه تغني غنا بتاع حقيبة لانو الناس الموجدين في الساحه البغنو غنا الحقيبة كمية هائلة جداً نطرب جداً لغنا الحقيبة يكفي ولكن لمن نجي نقول عن ثقافتنا نحنا بتلقي في قلة طرحت عشان كدا الحاجة الموجودة الانت قادر تحس بالمتعة والدهشة وانت بتسمعها اسمعها من الناس القاعدين يقولوها لانو في ناس اصلا قاعدين يقدموها، اما انا دائماً بحاول افتش الحاجات الما اتسلط عليها الضوء، الحاجات البتمسنا برضو زي ما في الحقيبة ضرب لازم يكون في مناطق فيها حاجات يعني يكون في موازة يعني زي ما انت بتأكل الناس كل مره تفاح تقوم تجيب ليهم تفاح وعنب وموز وبرتقال وكدا ببقي اجمل واروع دي الفكرة بالضبط، يعني مافي مشكلة في قصة الأغنية الوطنية دي، انا يمكن عندي عيب كبير الغنا الوطني القضايا القاعد اقدمها في مشروعي يعني دايرين الخير دايرين السلام وقفه الناس والسندة كيف نسند بعض نوقف الحروب دا كلو غنا للوطن ومحبة الوطن والاستقرار ولكن هو قاعد يتخطى في الغالب بتاع الشكل الأنا اخترتو كطريق، بس لكن انت ممكن تطرح السؤال تقول انتي ما غنيتي غنا وطني بلغة الوسط ممكن اقول ليك ما غنيت.
كلي شكر وتقدير وامتنان لجريدة الأسياد و سعيدة جدآ بالاستضافة الجميلة دي وان شاء لله نبقي ضيوف خفيفين الظل على الناس وخالص محبتي وتقديري واحترامي وان شاء لله يا رب كل الشعب السوداني بخير وسلام وامان بوداد وفي تطور دائماً ان شاء لله وشكرآ كتير في خالص محبتي