د. حسن التجاني يكتب: ..وهج الكلم..عروس البحر يا حورية…!!
د. حسن التجاني يكتب: ..وهج الكلم..عروس البحر يا حورية…!!
جميلة بورتسودان …وجميل الشرق وجميل غربنا وجميلة جزيرتنا …وجميل سودانا كله والله جد.
* لست لاني من الشرق وهذا سر العشق …فانا من كسلا ولكني اعشق فاشر السلطان واحب عروس الرمال واهلي في الجزيرة مدني ومارنجان وحلة حسن وبركات ارض المحنة ..انا احب السودان كل السودان واعشق نيله ونهر النيل وانا المولود في بربر ورويان بما النيل …والتهم سمكه في السكي الموردة وليمونها البااااارد .
* كل اجزائه لنا وطن ….السودان بلد عظيم بلد سيادي لكنه محسود من اهله نعم من اهله…كلهم حاسدين الا من رحم ربي فيهم لا يحبون له الخير فقط يريدون تجفيفه فقط لحياتهم علما بانه زاخر بكل شئ لمدي الحياة زاخرا بنيله وارضه ومعدنه وذهبه وطبيعته .
* من منا لا يحب سودانه ..الا هم الذين باعوه بابخس ثمن لكن نسوا انه وطن عزيز غالي لايباع لكل من هب ودب فشروط بيعه عصية وهي فناء كل ارواح المخلصين المحبين له .
* هذه المقدمة كان يمكن ان تطول كثيرا قبل الدخول في لب الموضوع اصلي متيم بالسودان وحب السودان ومشتاق لتراب السودلن وانا فيه وقدماي تطأ كل ذرة من ذرات ترابه تدخل فيا الراحة والسكينة والاطمئنان …الله لك يا سودان ..جدودنا زمان وصونا علي الوطن علي ترابه الغالي الما ليه تمن …..لكن فرطنا في الوصية ودفعنا التمن غالي واتشردنا واتبهدلنا واتيتمنا واتنيلنا وعند الله تجتمع الخصوم .
* نشر الاعلامي الشاطر جدا الوطني الغيور المخلص لوطنه الذي يعمل بفهم اعلام دولة كاملة عبر عدسته الاعلامية الشهيرة …الاستاذ علي حسن علي ..نشر خبرا مفاده عودة حكومة الامل بحضور رئيس الوزراء د كامل ادريس وهذا خبر مبشر جدا يعني عودة الروح لعاصمة البلاد الخرطوم واعادة سيادة الدولة .
* بورتسودان جميلة وحنينة ولياليها لن تنسي وهذه الفترة التي قضتها الحكومة هناك ستظل جزء من تاريخ السودان ستعلم بها الاجيال جيلا بعد جيل وارتباطها بالامان في ظروف الحرب وقساوتها
حضرت جزء كبير من تاريخ الحكومة الادارية ببورتسودان واستمتعت بالتجوال الليلي علي ضفاف البحر الاحمر وحضرت ساعات الفجر علي ضفافه وشربت نسكافي الركن الهادئ وما اجمله واروعه من نسكافي …وجلست مستمعا لعسكر معركة الكرامة مرة معجبا وثانية مستفسرا واخري (مضطربا ومطربا ).
* عوة الحكومة للخرطوم …بداية انطلاقة حقيقية لعودة السيادة من عاصمة البلاد …ومؤشر طيب جدا لمعافاة مقرن النيلين وخلو البلاد من دنس الدعامة ووسخ مليشيا ال دقلو المتمردة الارهابية المرتزقة.
سطر فوق العادة :
وجود كل الوزارات في مبني واحد لا يخيف ولا يرهب …فالتأمين قطعا سيكون عاليا والامن متوفرا وهي رسالة للعالم اجمع اننا عدنا ونحن اكثر قوة وهيبة …فليدم لنا السودان وطن.
السيد والي البحر الاحمر ستصبح مهمتك معقدة جدا لادارة الولاية كل الاعذار التي كنت تبني عليها مبررات اتساخ عروس البحر ستصبح خيوط واهية بحجة انها كانت تستضيف كل السودان ….اها مشوا منك ناس كل السودان ….يبقي عليك قبول التحدي بالاهتمام بها ونظافتها وارجاعها الي ما كانت عليه ايام زعيم الشرق المرحوم دكتور الطاهر ايلا…بورتسودان تهمنا فهي المدينة القادمة (اهمية).
(ان قدر لنا نعود)
