نادين خان مخرجة تصنع من مناخ (الخوف والتناقض) مسلسل (مين قال)

نادين خان مخرجة تصنع من مناخ (الخوف والتناقض) مسلسل (مين قال)
____
رؤية/ هيثم الطيب

+ مسلسل ( مين قال) عرض في عدد من الفضائيات من إخراج/ نادين خان،واستطاعت تقديم تجربة اخراجية ناجحة للغاية فيها كل أدوات الفعل الاخراجي الإبداعي،المسلسل بناقش قضية صراع الرغبات بين الأجيال والتنازع بين تحقيق رغبة خاصة للابن أو الابنة ورغبة خاصة بالأسرة،ودي بصنع صراعات وتشكيلات التناقض في طريقة الشوف للحاجات ومحاولات الأب لصناعة نموذج خاص بيهو في ابنه ورسم ملامح مستقبله برؤيته،الصراعات
النقاشية دي صنعت حيوية في المسلسل وانتجت بعد تاني ظهر في كمية من الاصحاب أولاد وبنات في قروب كان يشكل الحضن الآمن لكل واحد/ة من معاناة داخل الأسرة مختلفة الأسباب والتناول والأبعاد..
المهم القروب ده عمل حياة موازية لكل واحد/ة وصنع طريقة حياة جميلة ليهم برغم اشكالياتها المتعددة،كانت حياة أقرب ما تكون لفهم بحث عن جنة هربا من جحيم حياة أسرية بالممارسة أو الفقد أيضا..
المخرجة نجحت في صناعة المناخ الأسري المفقود للجميع كأنها بتعمل شكل ادانة حقيقي..
المدهش إنو جزء من الأولاد والبنات لأول مرة يكون ليهم عملية دخول في تجربة تمثيل،لكن نجحوا بشكل رائع،عشان شغالين مع مخرجة دارسة وفاهمة النص ومناخ الحركة فيهو،وتعقيداته النفسية والاجتماعية،وقدرتها في عمل انسجام بين اولاد وبنات لاول مرة يشتغلو مع بعض ويعرفو بعض،في المسلسل طلعوا كانهم عايشين سوا والتصوير شغال فيهم وهم ما عارفين،وصلت بيهم لدرجة عالية من فقدان حساسية كاميرا وتفكير فيها وتركيز معها،نجحت عشان عارفة يعني شنو صناعة أسباب نجاح حقيقية لمسلسل بطبيعة خاصة..
سبب نجاحها في صناعة قروب شبابي في سن معينة،رؤى خاصة،اهتمامات مشتركة،اختلاف مزاج وتربية وترسبات منها،التناقض ده كلو كان في مكان واحد بس في مخرجة بتعرف تحرك الخيوط كلها في الزمن والصراعات والنقاش المليان بمحاكمة خاصة لكل فعل من أسرة (أب أو أم)..!!
انت كمشاهد بتشوف القروب مع بعض،تحس بالانسجام ،ده سببو إنو المخرجة بذكاء عملت ورشة معايشة لي بعض،عشان التعود والانسجام يكون طبيعي والعملية التمثيلية تكون مطابقة لسيناريو مكتوب بذكاء حول القروب الفيهو مناخات (احساس بالأمان،التقارب،مساحات متحركة لكل واحد/ة يجسد احساس حرية مفقودة،الحركة النقاشية المفتقدة في البيت،مساحات فضفضة بلا خوف،مساحات هروب نفسية وجدانية)،استطاعت المخرجة تجسيد كل ده في قروب تمثيلي شبابي تحققت فيهو جزئيات مكتومة من الأحاسيس والرغبات..
المخرج صاحب الذهن التدريبي دايما ناجح ومدهش في نتائج كل أعماله عشان الشخصية القيادية فيهو كمخرج مليانة معرفة قادرة على صناعة الممثل حتى لو كان لأول مرة..
وده نجحت فيهو نادين خان بجدارة كاملة..