من كلمتين بس طلع مسلسل (راجعين يا هوى)..

من كلمتين بس طلع مسلسل (راجعين يا هوى)..
رؤية / هيثم الطيب
الميزة الحقيقية للأديب الراحل/ أسامة أنور عكاشة هي انو بعمل انقلاب واسع في إي مسلسل يكتبو،يشتغل على فكرة كبيرة وإنقلاب على مستوي سياسي واقتصادي واجتماعي وثقافي ويطلع خيوط المسلسل من هنا،ويربطها مع بعض بذكاء سيناريستي بديع،عشان كدة كل مسلسل ليهو البطولة المطلقة للفكرة وكل الممثلين والممثلات عندهم بطولة خاصة بيهم،كل واحد بطل في زاوية معينة ودي الكتابة الحقيقية والذكية والمحركة للمسلسل،لو تابعنا كل مسلسل ليهو حا نعرف إنو اشتغل على تحريك الشخصيات مع الإنقلاب الواسع المصنوع اساسا كدايرة تتحرك حولها الأحداث والشخصيات كلها،البطل كلمة واشارات للممثل والممثلة..
كل ممثل / ة اشتغل في مسلسل ليهو تشوف فيهو قيمة البطل الكامل وتمشي لشخصية تانية برضو تحس انو بطل بجد..
ده صناعة في كتابة الدراما وشغل سيناريست عارف يصنع ويربط ويتحرك بالأحداث ويحرك معها انفعالات النص والممثل كمان،ده حرفية عالية بجد وقليل يستطيع يعملها..
ادخل اي مسلسل ليهو وحا تحس في بطولة كلمة وبس مرتبطة بحدث معين،تحريك البطولة بين كل الشخصيات دي بصنع القيمة الحقيقية للدراما التي في أصلها عرض وجهات النظر كلها وبحيادية مطلقة،لايوجد هنا انتصارات وهزائم لفكرة أو شخصية،مرايا عريضة فيها كل شيء يتحرك على رؤية وتناقش رؤية تانية..
كاتب المسلسل الذكي ما يضع رأي شخصي في الشخصية عشان تعبر عن حاجاته وآراء خاصة بيهو،يصنع الشخصية بفهم معين وهي بعد كدة تشتغل على كدة،الديكتاتورية الخاصة بالكاتب لو طلعت هنا حا تهدم كل العمل وتكسر كل شيء..
حاليا في مسلسل (راجعين يا هوى) كتبه الراحل/ أسامة أنور عكاشة وعمل السيناريو والحوار / محمد سليمان عبد المالك ومن اخراج / محمد سلامة وفيه من الممثلين خالد النبوي بكل الذكاء التمثيلي المليان بيهو ومعاهو برضو نجوم تانيةزي نور اللبنانية،المسلسل يتحدث عن إنقلابات اجتماعية مختلفة بس كلها مربوطة بفكرة واحدة (كيف نشتغل على حلول)،مع خيوط متحركة اصلا عشان تصنع الأزمات وتعيد الكلام فيها زي الخذلان والعتاب وما بينهما وده صنع مساحة يتحرك بيها كل واحد/ة في النص ويربط الانفعالات الخاصة بيهو مع معيارية الخذلان كان كيف وليه والعتاب مفترض يكون كيف وبأي طريقة..
إبداعي بجد تشتغل على كلمتين وتطلع منهم المتراكمات دي والمتجددة مع كل كلمة وزمن ومستقبل..