محمد علي التوم من الله يكتب: ..مفاكهات..صحفي وبياع حطب !!
محمد علي التوم من الله يكتب: ..مفاكهات..صحفي وبياع حطب !!
قالو لي بتبيع الحطب ؟
قت ليهم اي والله
سالوني ما هو السبب
قلت ليهم عدييل
الدنيا دي بت الكلب
جبرتني لي بيع الحطب
ونحن بنعيش ايام عصيبة
مع الحرب
لا ينفع الشعر البليغ
لا صحافة لا فنون لا ادب
ما بجيب قرش الا البتاكلو وتشربو
تبيع لحم تبيع خضار تبيع رطب
تعيش عزيز زي العجب
ما البطن صادرت الخيال
حثى الفكر اصبح خرب
والحرب دي بت الكلب
خلتنا نلهث ننكرب
ورا البطون
عشان نقيف بس بالغصب
واطفالنا ما يصيبم نصب
واقول ليكم حقيقة
مالو بس بيع الحطب
دايريني املا الميديا
بالزور والكضب؟
واكسب قريشاتا خبيثة
وابيع بلادي رخيصة
واهرب واغترب ؟
الصحفي لا مرتب لا معاش
والوضع اصبح ملتهب
يا وزير خزانتنا الهمام
اسمعني مرة واقترب
اطفالنا ما شافو العنب
ولا ضاقو طعم الفاكهة يوم
والمدارس نايمة نوم
والعلم في رؤوسم نضب
والقنابل والمدافع اصبحت
في بلادنا موسيقى القرب
وعشان اجيب كسرة ورغيف
كسرت ليك قلمي الرهيف
ودفنتو في كويمات حطب
وعلينا جاي .. علينا جاي
من صحفي لي بياع حطب
محمد علي التوم من الله
