محمد علي التوم من الله يكتب:..مفاكهات.. اصلاح النسيج الإجتماعي
محمد علي التوم من الله يكتب:..مفاكهات.. اصلاح النسيج الإجتماعي
عشان خاطر بلادنا الغالية
نتصالح و نتسامح ونتآلف
نصلح لي نسيجنا الاجتماعي
ولي رفعة وطنا السامي نتكاتف
🌹🌹🌹🌹🌹
الحرب ولدت مصايب الفرقة
وبي تمام وحدتنا ما بنجاسف
سودانا الوسيع يسع الجميع
يا اخونا استجيب و ما تخالف
🌹🌹🌹🌹🌹
وطنا عريق كريم وغني
مفروض تكون عار ف
نهر الجنة ب يجري فيهو
ومليان دوام سارف
🌹🌹🌹🌹🌹
في سهول كردفان الغرة
صمغ الهشاب داك وارف
في وديانها ترعى انعام
تكفي الدنيا خليك عارف
🌹🌹🌹🌹🌹
في دارفور العريقة
جبل مرة البهاء الشارف
ابداع الطبيعة الرائعة
وسر الجمال الخاطف
🌹🌹🌹🌹🌹
خير الازرق المعطاء
دافق وما بتلقاهو تب يوم واقف
دهبو الفي خزائن ارضو
يكفي الزمان الجاي والكان سالف
🌹🌹🌹🌹🌹
وما سمع بالقضارف؟
الزول الصغير بقى عارف
العبش ما ليهو حد
تقول سيلا عنيدا جارف
🌹🌹🌹🌹🌹
وان قت الشرق الجميل
ثغر السنا المتلاصف
امين خيرات بلدنا
الما بتلقا زيو وصائف
🌹🌹🌹🌹🌹
شوف كسلا الوريفة
الجود هناك لو شايف
جناينها وجبل توتيل
فيها التليد والطارف
🌹🌹🌹🌹🌹
جزيرتنا الحنينة
بطمنك لو خايف
كنز افريقيا كلها
مافيها زولا هايف
🌹🌹🌹🌹🌹
خرطوم الصمود
مدفع قويا قاصف
تاج العزة رمز الوحدة
مصدات من العداء العاصف
🌹🌹🌹🌹🌹
وعشان خاطر بلادنا الغالية
نتصالح ونتسامح و نتآلف
نصلح لي نسيجنا الاجتماعي
ولي رفعة بلدنا يا حبيب نتكاتف
٩ ذو الحجة ١٤٤٦ه..يوم عرفة
🌹محمد علي التوم من الله 🌹
