عبد المنعم شجرابي يكتب : مدرسة الشارع
عبد المنعم شجرابي يكتب : مدرسة الشارع
.استراحة. الجمعة
عبد المنعم شجرابي
مدرسة الشارع
*** الزمان.. الظهر الى زوال والعصر فى بداياتة..المكان مدخل كبري الحرية الشمالي وجنوب داخليات كلية الطب.. المشهد ..سيول بشر لا تنقطع ( والاعمي شايل المكسر ) والسيارات تزحف زحفا وتتوقف اكثر مما هى زاحفة وفجأة يدخل رجل وجهه بنافذة سيارتي مستاذننى الوصول الى ابو حمامة ان كنت واصلا
*** جوابت عليه تفضل وجلس الى جوارى ( ببسطه فى الجسم ..) و ( عصى مدبدبه.. ).. و( شنب مفتول ) ومن خيالى ( سكين فى ضراعه ).. يشكو من طول ولا قصر.. حيانى ورددت التحية بافضل منها سألنى فاجبت ذاهب الى ابو ادم لواجب عزاء وبالمقابل قال انه ماشى العزوزاب وبقت ( سكتنا واحده)
*** ترجاني الوقوف بالسجانة لاستلام امانة ( طالما الدرب جابو ) وقفت وقطع الشارع وعاد مبتسما ( بانجازه )
*** امتار وطلب مني الوقوف فى محطة ثانية للتزود بالخبز وعاد ظافرا برغيفات
*** فى محطة ثالثة طلب الوقوف بابو حمامه لشراء خضار ولحمة وعاد محملا بالاكياس
*** تقدمنا وفى محطة رابعة طلب الوقوف امام الصيدلية ومع اني ابتديت ازهج قلت ( ياولد ) اصبر الدواء اهم من ( الفات كلو )
*** دخلنا الشجرة ( وونستى معاهو بقت مسيخة ) طلب الوقوف امام ( بتاع الفواكه ) ولحظتها كنت ( كملت الصبر كلو ) فنزل وتحركت وانا ( اغلى غيظاً ) واتكلم مع نفسى يعنى ( الزول ده ) كان برضو حيوقفنى ليشترى ( سعوط ) ياخي دى ناس لا عندنا دم لا عندها ذوق يعنى الزول الثقيل ده كان متخيل العربية حقتو ولا انا شغال معاهو (راكب ملح ويتأمر فيني)
*** المهم وانا فى زهجتى دى لاحقتنى ركشه ووقفت امامى ونزل عمك ذاتو وبى شنباتو.قائلا والله ياشيخنا معليش كان اتاخرت عليك والله انت اكرمتنى وانا قلت ذى ما اكرمتني اكرمك ونزلت لى بتاع الفواكه زبوني مخصوص عشانك وعلى الطلاق ما تقول حاجة الفواكه دى منى لناس بيتك وانصرف سريعا بالركشة وانا محرج ومذهول وما عارف اقول شنو!!!!
*** الدروس المستفاده
^^^ فاعل الخير لا يعدم جوازية
^^^ ظن بالناس الظن الحسن
^^^ الشارع مدرسة تتغير وتتبدل مناهجها يوميا
*** هل جزاء الاحسان الا الاحسان
*** جمعة مباركة وكل جمعة وانتو طيبين
