عبدالمنعم شجرايي يكتب: بلدنا ونحنا سيادا
.. اضرب واهرب ..
بلدنا ونحنا سيادا
*** ( خسر ) الهلال من المريخ بالجوهرة الزرقاء ( وانهزم ) المريخ من الهلال بالقلعة الحمراء وفي لقاءاتهما المتعاقبة خسر هذا وكسب ذاك على أرضه وفي مباراتين جمعتهما خارج الوطن ( ضرب ) الهلال المريخ بالدوحة ( وصرعه ) بأبوظبي ( وجندلة ) الهلال لابن عمه المريخ الجمعة بالقاهرة مسألة وقت ليس إلا ( والجرسة ممنوعة )
*** بدل إزالة النفايات ونظافة المكان من تحتها نشطت ( جهة ما ) في مسح جداريات عليها شعارات الثورة وصور الشهداء وما علمت أن الثورة والشهداء في قلوب الثوار
*** ذكرى رحيله تؤكد أنه بيننا بروحه الطيب عبدالله زعامة وفخامة ورجل استثنائي إذا تحدث صدق .. وإن وعد أوفى .. وإذا قرر نفذ رحم الله زعيم أمة الهلال الطيب ود السارة المأمور والوكيل .. رئيس الرؤساء والإنسان النبيل الجميل
*** يواصل الناظر ترك زياراته لرموز النظام السابق ولا أدري للاطمئنان عليهم أم ليطمئنوا عليه بعد رحلة استشفاء تكفل بها البرهان وحميدتي أو كما قال !!
*** ترى ماذا تقول الفيفا لو علمت أن فريق الأمل الضيف وليس صاحب الأرض حلقت قوات نظامية رؤوس بعض لاعبيه عنوة وإقتدارا ؟؟شخصياً اتوقع أن يتجنب هولاء اللاعبون اللعب بالرأس وهم البارعون فيه
*** الزول ده محل ما تمشوا تلقوهو .. الزول ده حركاتو ياها وشغلو ياهو شغلو .. الزول ده نسأل الله يفككم منو
*** باقة ورد لحافظي الجميل باقة ورد لكل من يقدم الأحد رداً على السبت الذي قدم له
*** بقاء البلاد بلا حكومة ولا رئيس وزراء لأربعة أشهر يبكي وأنا انتظر الخريف لأبكي تحت المطر حتى لا يرى الناس دموعي
*** تقوم اليوم السفارة المصرية متمثلة في القنصل أحمد عدلي الإمام والملحق العسكري بزيارة حارس مرمى المريخ والمنتخب السابق الضابط المتقاعد عبد العزيز عبدالله لترتيب سفره للقاهرة للعلاج تحيا مصر وهي تسبقنا لعلاج بطل من أبطال السودان ..
صديقي العزيز عزيز سلامتك واذا شفيت شفي الناس كلهم
*** ما بهرني حفل تدشين قناة البلد الباهر والزاهي والباهي قدر ما بهرني الاسم ف( البلد ) بخيرا .. البلد جبال ووديان .. وأرض وماء .. وشجر وطير وضرع .. البلد ولد ( ضكر ) .. وشاب ( فارس ) .. وراجل ( حبوب ) .. البلد فستان واسكيرت وبلوزة وعباية وتوب داخلهم إنسانة جميلة الدواخل .. ( البلد ) نقارة وطار وتمتم ودليب ووازا ومردوم .. البلد لوري ومركب وكارو وركشة وبص .. البلد شروق وغروب .. البلد دين وتاريخ وجغرافيا وكيمياء وفيزياء .. البلد عراقة وأصالة وحداثة .. البلد دمعة ولمة ومقابر وصالة وبيت بكى وبيت عرس .. البلد حدث وحديث.. البلد طويلة وعريضة وعميقة .. البلد حلم وأمل وأماني ..
( وشاشة البلد ) يا ناس البلد تقبل كل شئ إلا ( المنظراتية ) المتفلسفين والسياسيين ( الكضابين ) والقادة الفاشلين البلد ( بلد بلدنا ونحنا اسيادا )
عبدالمنعم شجرابي ..
