عبدالمنعم شجرابي يكتب :ومن هنا نبدأ

.. اضرب واهرب ..
ومن هنا نبدأ
* الاتحادي الأصل الذي صمت دهراً خرج عن صمته واصفاً انتخابات نقابة الصحفيين بالصراع السياسي وما أعجب ( دقة الوصف ) من ( الوصّافين )
* تجاوز مجلس الهلال أسماء ( زرقاء شديدة الزرقة ) وهو يعلن عدد من أعضاء قطاعاته والمجلس ما شاور ( وعدم الشورى يسوي كده )
* أعفت وخفضت الرسوم للطلاب المعسرين ودي جامعة شندي العملت كده .. ( مين بعدها ؟؟)
* كانت تُلعَب ( شختك بختك ) أو بالمزاج الخاص ( ويا دووب ) ظهرت للهلال جملة تكتيكية في المعكوسات و( عقلية ) في تنفيذ الضربات الثابتة ( ومن هنا نبدأ )
** علمنا بتوقيع المريخ ميثاق توأمة مع سان جورج الإثيوبي وماذا عن أخبار الوفد المسافر لتركيا لإحضار النجيل .. وماذا عن نجيل دبي ؟ وخليك من ( ده وداك ) ماذا عن سير العمل نفسه باستاد المريخ ؟
* الزول ده لا قادر يرجع ورا ولا قادر يمشي قدام .. الزول ده ما قادر يتحرك ( جاي ولا جاي ) .. الزول ده في ( طين سواتو ) وحلان
* سنوات وسنوات وهو ملتصق بهلاله وما غاب عنه إلا أيام بقائه مع قواته بالفشقة وهو يؤمن التحرير ويسند الرجال .. الفريق عصام كرار الهلالي ود الهلالاب والراجل ود الرجال
( تعظيم سلام )
* نتمناها أكثر إثارة وبعد تجربتي الاشانتي نتمنى تجربة سيمبا التنزاني أعنف وأقوى وجمهورنا في الانتظار
* شكراً جزيلاً وجميلاً ونبيلاً لهلال الساحل والأهلي الخرطوم وهما يطلبان بكل احترام وذوق الجوهرة الزرقاء ليلعبا عليها إفريقياً .. وشكراً طويلاً وعريضاً وعميقاً للهلال وهو يستجيب بلا تردد للطلب وبكل الجمال
* أكمل تسجيلاته بلاعبين جيدين وتعاقد مع ابراهومة مديراً فنياً ويسعى لتأهيل استاد النهود .. وحيدوب في الممتاز ( عندو كلام تاني )
* وشخصياً ما خايف من زعل الهلالاب لو قلت أنني تمنيت إصابة مرمى الهلال أمام الاشانتي ( ومن غير ليه )
* ارتفعت حالات الطلاق بنسبه مخيفة ..
الحاصال شنو ؟
يا الباحثات والباحثون عن الطلاق افيدونا وأرحموا بيوتكم يرحمكم الله
عبدالمنعم شجرابي ..