عبدالمنعم شجرابي يكتب: ..مقتطفات الجمعة..شفشفة رئيس
عبدالمنعم شجرابي يكتب: ..مقتطفات الجمعة..شفشفة رئيس
الحديث يطول ويتمدد ويعاد ويكرر وأخيراً يبدأ التنفيذ بعودة الوزارات إلى الخرطوم .. مع اهمال كامل لأهمية استرداد ( وعودة ) مقتنياتنا وآثارنا
( والنسى قديمو تاه )
*** مظهره أولاً وثانياً وثالثاً هندام ( وأناقة ) الفنان جزء من ( صوته ) وفي ( الحتة دي ) أتحدث أيضاً عن أعضاء الفرقة الموسيقية ولا استثني الواقفين على أجهزة الصوت والضوء
( واياك أعني فاسمعني يا انت )
*** لا أحد يعرف إن كان ( استخراج ) عدد الجوازات الخاصة قد تخطى أو توقف عند العشرين ألف والتوقف عن أي إشارة ( للجوازات الأجنبية ) طبيعي ومعظم مسؤولي الدولة إن لم يكن كلهم حملة للجوازات الأجنبية
*** والرئيس الفنزويلي وزوجته بغرفة النوم .. صاحت زوجته مادورو أنا سامعة كركبة .. رد كركبة شنو يا ولية قولي بسم الله .. قالت قسماً بالرب في كركبة . يا زولة بطلي وهم واتغمتي نومي .. قالت مادورو .. وقبل أن تتم دخل الجنود الأمريكيون الغرفة
( والتفاصيل من خيالي ) مع تحياتي لمادورو في ( مثواه الأخير )
*** عند انتقال الوزارات لبورتسودان الايجارات ( طارت السماء ) ومع عودتها للخرطوم ( انخفضت ) وتواصل الانخفاض
( ويفرق كتير طعم الحلو لو يبقى مر )
*** الأجانب والغربا فتشوا العذر لمنتخبنا الوطني ولقوهو ليهو واتكلموا عنه كويس قدام المنتخبات الأفريقية الكبيرة .. وعشان شنو يا شدرابي ود خيتي ست الجيل أولاد البلد قايمين عليهو ..
يا سلام عليك يا بت أحمد وانتي المتابعة تتكلمي في الكورة
بت أحمد ربنا يحفظك ويملا جوفك صحة وعافية
*** دخل ضيفاً وقبل أن يتم السلام رأى فتيل دواء وسريعاً تناول منه جرعة صرخ فيه صاحب الدار يا زول انت بتشرب ساكت كده، أجاب أكيد الدواء ده بيصادف ليه حاجة في جسمي ويعالجها .. والحاصل كترت مشاكل البلد تخلينا ( نبلع ساكت )
*** بتقلباتها داخل الملعب تسمى ( المجنونة ) والمجنونة الهلال العالمي ( طير جنها ) وهو في آن واحد يلعب محلياً وإقليمياً وقارياً يلعب ( بي هنا وبي هناك وبي غادي ) ويا بخت السودان ورواندي وأفريقياً بالأسياد
*** الشاعر حميد صاغها والفنان مصطفى سيد أحمد غناها ليؤكد المجتمع الرياضي عليها تماماً
( ايه الدنيا غير لمة ناس في خير أو ساعة حزن ) وأفراده كالبنيان المرصوص في ( الحلوة والمرة ) .. أيها الرياضي هنيئاً لك باخوة لك لم تلدهم أمك تلقاهم واقفين معاك في ( السمح والشين )
*** جميع أنواع ( الشفشفة ) شفناها وعرفناها ولكن ( شفشفة رئيس ) كتيرة شديد شديد والعالم مع ترامب
( مش حيقدر يغمض عينيه )
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً ..
جمعة مباركة وكل جمعة وانتو طيبين
عبدالمنعم شجرابي ..
