عبدالمنعم شجرابي يكتب: ..مقتطفات الجمعة..الباب الكبير
عبدالمنعم شجرابي يكتب: ..مقتطفات الجمعة..الباب الكبير
بالدوحة عاصمة عواصم كأس العالم قدم منتخبنا الوطني لوحة بطولية .. بذل فيها واجتهد .. صال وجال .. قاتل واستمات .. لعب ناقصاً وكان نقصه نقص القادرين على التمام فأفرح وأسعد وأبهج
( ترليون مبروك )
*** التفاوض لقبول أو رفض ( التفاوض ) محتاج ( لتفاوض داخلي ) وفهم عميق وإن جاء القرار ( بالقبول ) فالمفاوض في حاجة إلى صبر الأنبياء وللتذكير فالزعيم جون قرنق قال : تسعة شهور ونحن نتفاوض ولو كان في إمرأة حملت في أول يوم للمفاوضات لولدت ونحن بنيفاشا نتفاوض ومن عندي أقول
: ( طاولات التفاوض عاوزة كده )
*** فقد أسرته بالكامل ونزح مع الجيران للقاهرة ليعيش بينهم فرداً منهم مواصلاً تعليمه .. محمد المرتضى ليس وحده فغيره كُثر بالوطن وخارجه وقلبي مع أطفال المايقوما فاقدي السند فاقدي الأبوين
*** السادة موزعي ( صكوك الوطنية) ومُلّاكها الذين ( يوزعونها ) كيف شاؤوا .. هل تكرموا بإخطارنا ما هي
المواصفات المطلوبة ؟؟ وما هي شروط اكتسابها ؟؟ وكيف يكون مظهر طالبها ؟؟ وأين سيكون موقعنا في ( الترتيب ) إذا ما مُنحناها ؟؟
( افتونا بربكم افتونا )
*** أضحك وأحزن على من يفرض نفسه ( أستاذاً ) ويحمل في يده ( قلم التصحيح ) وعامداً متعمداً .. يبحث عن ( الغلط ) .. ويتجاهل ( الصاح )
*** يا سلام يا سلام على الشغل والله يا شدرابي ود خيتي ست الجيل مستشفى شرق النيل بعد ما فتحوها طلعت سمحة شديد والسمح أكتر
بتستقبل المرضى بالمجان وبتصرف الدواء بالمجان عليك الله اكتب عنها وعن الدكاترة والناس الشغالين ..
يا بت أحمد بعد كلامك الحلو ده أكتب شنو .. بت أحمد ربنا يحفظك ويملأ جوفك صحة وعافية
*** تاريخ السودان ( المكتوب ) فيه الكثير من التضخيم والتبخيس .. والاضافة والحذف .. والترفيع والتقليل .. والتاريخ الذي بدأ أو سيبدأ بالحرب واضح أن ( الكضب ) سيكون المدخل ( والكضابين ) سيدخلون لا من ( باب النسوان ) بل من باب الرجال ( الباب الكبير )
*** عادت فرقة عقد الجلاد .. عاد كورال معهد الموسيقى عوداً حميداً مستطاب عاد ( الفن الجميل ) فهل تسمعني ( القونات ؟؟ )
*** ياحليل الفكي الكتب ليكم الحِجبات
*** زعيم سياسي رياضي ورقم مجتمعي وتأبين الريس ود الياس يرحمه الله الاثنين القادم لمسة وفاء كانت واجبة على ( الدولة ) سيقوم بها ( الأهالي ) الذين يعرفون قيمة وقامة الزعماء
( وأحبك يا سودان )
*** بكل قوة بكل عنفوان وقفوا مع منتخب بلادهم حتى انتصر
أهلنا السودانيون بقطر
( تعظيم سلام )
*** لا الهلال انتصر على المولودية الجزائري لا صن داونز فاز على لوبوبو الكنغولي فالهلال بالأحد أمام ( كتاب جديد ) غلافه الفوز
( والفرحة لازم تستمر )
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً
جمعة مباركة وكل جمعة وانتو طيبين ..
عبدالمنعم شجرابي ..
