عبدالمنعم شجرابي يكتب حلاوة وباسطة وبسبوسة
عبدالمنعم شجرابي يكتب حلاوة وباسطة وبسبوسة
* الغيابات بأسباب متفاوتة وجدت في صفوف الهلال قبل المباراة وما كان حاضراً هو الإصرار والعزيمة ( والقرار ) ببقاء الكأس ( بدولابه بالبيت الأبيض ) .. تحت شعار الكاس كاسنا ونحنا ناسو وكان ( تجديد إقامته ) بمكانه الطبيعي مسؤولية تضامنية
* الحاصل ( اتقاودنا ) صغار وكبار .. شيبنا سبق شبابنا وبرجالنا وحريمنا ستفنا الاستاد ( تستيفة جد ) .. على أنغام الألتراس شجعنا ووازرنا وساندنا ( وكده )
* ويا زول الأهلي خصمنا ( الغتيت ) كان ( عندو كلام تاني ) لعب بالدفاع الكامل على طريقة اللعبة الشعبية ( الرمة والحراس ) ويا حليل اللعبه دي ( ويا حليلنا ) وبالمناسبة أنا كنت شاطر فيها زي ما كنت شاطر في البلي ( وبخرِت أولاد الحلة ) وأرجع البيت وجيبي مليان بلي وقروش
* الهلال وطوال التسعين دقيقة كان بيفتش للهدف بضغط رهيب والأهلي ( ميت موت ) عشان يوصل المباراة للضربات الترجيحة .. والأعصاب مشدودة ( والواطة مسخنة ) والأولاد شغالين ضرب وخبت في الكورة المسكينة وهي بين أرجلهم ( تئن وتجن ) ثم ترتد حنيناً
* المهم نال الأهلي ( المحترم ) ما يريد ليعلن الحكم عن الضربات الفاصلة وهنا اقتربت ( صلايب ) السكري إلى ما يقارب إنتاج شركة سكر كنانة .. وارتفعت معدلات الضغط إلى إنتاج ما ينتجه السد العالي من الكهرباء .. والحمد لله أنا بقيت من الناس ( الما بتشوف ولا تسمع )
* ويلا يلا ضربة بضربة وليضرب الهلال أخيراً ( بالضريب شقاق العناقريب ) لتنتهي ( الحدوتة ) والمدرجات تغلي متدثرة متزملة بالفرح .. والناس آخر ( حلاوة .. وباسطة .. وبسبوسة ) .. عناق وتهاني وتبريكات والكاس زاتو مبسوط وفرحان يطير من يد إلى يد ( ويؤشر ) للجمهور مبتسماً
* السادة رئيس وأعضاء مجلس الهلال السيد المدير الفني وأعضاء الجهاز السادة اللاعبين والسادة الأسياد في كل مكان لكم أحلى التهاني وأجمل التبريكات وللسيد الكأس شخصياً ( نزلت أهلاً وحللت سهلا )
وختاماً الهلال ( عالم جميل )
الهلال عشرين على عشرين
وما تسألوا ( العنبة الرامية في بيتنا )
أسألوا أبوعشرين
عبدالمنعم شجرابي ..
