عبدالمنعم شجرابي يكتب : تعاد لورشة عطبرة
ْ عبدالمنعم شجرابي يكتب : تعاد لورشة عطبرة
*** العملة السودانية لا تحمل في ( محفظة ) وتظل في الجيوب ( معفصة ومكرفسة ) والأسوء أن هناك من يجر قلمه ويكتب عليها وهذا ما يجعل الجنيه السوداني مع عوامل أخرى ( مذموماً مدحورا ) والعشم كبير في تغيير التعامل معه ليكون ( محترم ) ظاهرياً بين العملات
*** الهلال ( وعين الحسود فيها عود ) أكمل خارطة مثالية لترميم فريقه والأهلة العقلاء الأسعد بنجاح المريخ ( تغيير جلده ) ومباريات القمة القادمات ( نار منقد ) وحاضراً ومستقبلاً فالأزرق الشاطر كما كسب بالدامر سيكسب
*** سرحوا في مدن العاصمة المثلثة .. ومرحوا في مدني ومدن الجزيرة .. ولعبوا بالمصفاة .. وتمرجحوا بمراجيح مدينة الطفل وبالاذاعة رقصوا وأخيراً هُزم الدعامة ودُحروا
( وما دوامة دنيا ما دوامة )
*** لا لأنني عطبراوي ( كامل الدسم ) ولكن لأنني مع الحق والحق أقول التاريخ يشهد أن استاد عطبرة هو الأول على الجميع وعليه ( فشيخ الاستادات ) هو استاد عطبرة وليس استاد الخرطوم
*** محمد الشيخ مدني معلم حمل الطبشيرة ولازال .. رياضي كان قيادي بالاتحاديين الخرطوم والعام وترأس مريخ السودان .. واجتماعي يشار له بالبنان وفوق هذا وذاك فشيخ العرب ود الشيخ وأبو الشيخ خصه الله ( بقضاء الحوائج ) ليقف ( مريض ) بخدمة الناس وعلى ما أقول فالأعزاء جمال الوالي وعبدالرحمن يحيى الكوارتي وعصام الحاج والشاذلي عبد المجيد وآخرون شهود
( والله خير الشاهدين )
*** كانت دول شرق ووسط أفريقيا تعاني من الحروب والمرض ( والجوع ) وإن تبدل حالها وترقت وترفهت حالياً فهذا لا يلغي أن المريخ العظيم عندما فاز بكأس سيكافا فاز ( بكأس المجاعة ) ولو كره الكارهون
*** مصطفى ود آمنة زعلني شديد وهو يقول لمجتبى أخوه في التلفون ما ترجعوا خليكم في مصر البلد مليانة باعوض ونفايات وحميات .. عليك الله يا شدرابي ود خيتي ست الجيل ده كلام ده! الناس كانت قاعدة تحت الدانات والجوع والعطش والرصاص والمسيرات!!
يا بت أحمد ما تزعلي إن شاء الله كلنا راجعين راجعين
بت أحمد ربنا يحفظك ويملأ جوفك صحة وعافية
*** انتصار الهلال عليه ( بالرباعية الملعوبة ) باستاد الدامر كان ( المعالجة الغالية ) لكل اشكالاته واعادة توازنه وإصلاح حاله فشكراً جزيلاً وجميلاً للمريخ العظيم وهو يتقبل ( بكل الحب ) هدية الهلال الأعظم تحت شعار ( بارك الله في من أهداني عيوبي )
*** حكومة تأسيس قامت ( أساساً ) بلا ( أساس ) ولا ( أثاث ) ولا ( تأسيس ) .. تأسيس قامت (خربانة ) تأسيس
( تعاد لورشة عطبرة )
*** واحد مشى للدكتور قال ليهو والله انا شاكي اني عندي عقم ويمكن اكون وارثه من ابوي قال ليهو الدكتور كيف وارثه من ابوك؟! وانت جاي من وين؟!! قال جاي من البلد
( ابتسم مع الأمنيات بالابتسامة المستدامة )
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً ..
عبدالمنعم شجرابي ..
