عبدالمنعم شجرابي يكتب : بلدنا واسعة
.. استراحة الجمعة ..
عبدالمنعم شجرابي
بلدنا واسعة
*** ناس الخرطوم ازيكم عساكم طيبين ؟؟
×× اهلا بيك وطيبين والحمد لله
*** الخرتوم ياها وانتوا لسه في حالكم ؟؟
×× لسه
*** لسه بتفطروا بالسندوتشات الفاضية وتتغدوا بعد المغرب ؟؟
×× لسه
*** ولسه بتزاحموا في الموقف وتجروا ورا الحافلات ؟؟
×× لسه
*** ولسه فى شقاوتكم ؟؟
×× لسه وازيدك من الشعر بيت شقاوتنا زادت بقفل الكباري وتتريس الشوارع
*** كانت هذه محادثة مع الحبيب العقيد شرطة ( م ) محمد علي والذي .. ساب الخرطوم وقام بارحا بصورة ( مجنونة )
*** فصديقنا ود علي وكما جاء على لسانه أنه ذهب إلى مكتبه صباحاً نشطاً جاداً مبتسماً فوجد خطاب إحالته للتعاقد أو الصالح العام أو المعاش منتظره وقال رفضت تقبل عزاء زملائي أو التقدم باستئناف وذهبت فوراً إلى سوق السجانة لصديق وطلبت منه أن يلحقني غداً بدفار جانبو يحمل عفشي إلى الشمالية رافضاً أن أعطيه أي تفاصيل وفي طريقي للمنزل غشيت المدارس واستلمت شهادات أبنائي بعدها جمعت عفشي وسلمت جاري وزميلي بالشرطة المنزل والعربة الحكومية لتسليمهما وتركت أولادي معه ليلحقوا بي بالبص اليوم التالي
*** نزلت الشمالية بالدفار وسط لمة الجيران والأهل الذين لم أعرف منهم إلا عمتي والتي لم أراها سنين طويلة فدخل الجميع إلى منزل أبي المهجور زمناً فلم يتركوا عقرب إلا وقتلوها ولا عنكبوت إلا وأزالوه ولا شجيرات وحشائش بالحوش الكبير إلا وقطعوها وخلوا البيت يرقش ثم رصوا العفش وعلقوا الستائر ليستقبل المنزل أسرتي جاهزاً وأجمل من المنزل الخرطومي والثلاثة وجبات تأتينا من كل مكان لخمسة أيام
*** لم يكن هناك شئ مزعج غير الباعوض وكان الأروع صوت القماري والعصافير صباحاً بشئ أجبر أولادي على الاستيقاظ قبلها أما زوجتي الأمدرمانية وبت العز والعجن أصبحت بت البلد مثلما أصبحت أنا ومن أول أسبوع تربال بالبنطلون الجنز والتيشيرت الأخضر أحفر الجدول وأشق الترعة واحش القش وأطلع الشجر وزدت حقي فوق حق أبوي
*** أها يا اخوانا ومن تجربتي الخاصة عاوز أقول ليكم ما تضيعوا عمركم ساكت في الخرتوم .. خرتوم الجن دي لا فيها عيشة لا فيها فايدة أي زول عندو حق جدودو وأهلو يشوفو وين ويقوم عليهو .. والما عندو حق الأرض راقدة وما لاقية الزول البيزرعا دحين خليكم من شغل السمسرة والفراشات والبيع في التقاطعات والوظائف الهامشية وتعالوا للزراعة وغير الزيت والسكر والشاي والصابون ما بتشتروا حاجة من الدكان .. ازرعوا تاكلوا وتبيعوا وتنبسطوا وتكلوا الحيوان والطير وبلدنا واسعة ماتضيقوها .. كدي قولوا بسم الله وهاجروا إلى الريف
*** ود علي ضابط البوليس الشاطر والتربال الناجح لك مني المحبة والتقدير .. وزوجتي ووليداتي يقرؤوك السلام
جمعة مباركة وكل جمعة وانتو طيبين
