عبدالمنعم شجرابي يكتب : بعشرة في المية

.. اضرب واهرب ..
بعشرة في المية
* أصابت رصاصة العريس وأردته قتيلاً وحادثة الدامر المؤلمة سبقتها وجاءت بعدها العديد من الحوادث وفي موسم الأفراح الحالِيّ سيظهر استعمال السلاح وإطلاق الرصاص في بيوت الأفراح والممنوع بالقانون والمؤلم بالتجارب والمهدد للإنسان وانتبهوا أيها السادة حتى لا تتحول الأعراس مأتماً
* لا يختلف ( كوز وقحاتي ) وتتفق كل القوى السياسية السودانية المتفرقة أيادي سبأ على أن جبريل إبراهيم هو وزير المالية الأفشل على البلاد منذ استقلالها ( ويحلنا الحل بلة )
* لا تسأل عن سكر النيل الأبيض وسكر مشكور ( خليهو ساكت ) وعليك بوضع ( حبة تحت اللسان ) قبل أن تعرف أن مصانع السكر السودانية تعمل ( بعشرة في المية )
* باقة ورد لمعمري المساجد باقة ورد ندية لعباد الرحمن في مجالس العلم وحلقات ترتيل القرآن ببيوت الرحمن
* في إتجاه آخر يلعب الهلال أولى مبارياته الدورية والمنافسة الإفريقية كلام والدوري كلام ( وده براهو وداك براهو ) وهكذا قدر الكبار
* أسعد كثيراً بالمختلفين معي في الرأي محترماً لهم رأيهم وليتني استطيع الرد على مخاطبة السفهاء ( فسفهاء الزمن ده حقارين جداً )
* الإنقلاب فشل ( بتقدير ممتاز ) ومن يرى غير ذلك فليأتي بدليل واحد .. الإنقلاب ( كتل ) الثورة وفشل في السير في جنازتها ( بأمر الثوار ) والثورة مستمرة
* انتصر المريخ وخسر الهلال ولا جديد في الخارطة الجماهيرية فالإحصاءات ما برحت وما انفكت تقول من بين كل مئة مواطن 93 هلالابي وما تبقى ( حلال للطير من كل جنس )
* الزول ده من اليوم داك وهو على ذات الحال .. الزول ده من أول ظهور وهو بذات الظهور .. الزول ده لا الأيام علمتو ولا التجربة ادتو .. الزول ده ما زول
* وقف خطيباً مؤكداً أن ( الغناء حرام ) قلت عن أي حرام تتحدث وهناك من يغني ( لأمه وأبيه ) ومن يغني ( لصاحبته وبنيه ) ومن يغني ( لجواده وجمله ) ومن يغني ( للطير والشجر ) و( النيل والقمر ) ومن يغني بصورة أكبر وأجمل لوطنه هناك الجنود ( الشايلين الجلالة ) وعمال البناء يرفعون هاماتهم بأغنية جماعية وهناك وهناك ويا شخينا رجاءً ويا شيوخنا أفتونا في هذا المجال
* معليش معليش معليش فلا صلاح قوش مذمة للمريخ ولا عمر البشير مفخرة للهلال
عبدالمنعم شجرابي ..