عبدالمنعم شجرابي يكتب: اصحى يا بريش
••• حركة المرور شبه معطلة .. الشارع مغطى بكتل من البشر ..(والأعمى شايل المكسر) .. والصفوف على أبواب استاد الخرطوم متراصة من قبل المغرب لمتابعة مباراة الهلال والموردة وأنا على بعد أمتار من سور المقصورة الحديدي استوقفني رجلٌ ستيني على وجهه كل ( العفوية والطيبة )
سائلاََ ..
_يا اخو الناس دي مالها ملمومة كده ؟؟؟ جوة في شنو؟؟؟
*** ده ملعب والناس جاية الملعب
_ديل كلهم جايين يلعبوا ؟؟؟
*** ابداََ جايين يتفرجوا في اللاعبين البيلعبوا
_والبلعبوا شوية ولا كتار
*** شوية
_ بيلعبوا ليه؟؟؟
*** عشان يفوزوا بالكأس
_والبشيل الكأس منو من اللاعبين؟؟؟
*** الكأس للفريق لكن اللاعبين بدوهم حوافز
_حوافز يعني شنو؟؟؟
*** يعني قروش
_كتيرة ولا شوية؟؟؟
*** كتيرة
_برضو الناس البيتفرجوا بيدوهم قروش؟؟؟
***لا ابداََ ديل بدفعوا قروش عشان يتفرجوا
_الجابرهم على كده شنو؟؟؟
***بيحترموا أولادهم البيلعبوا ديل وبحبوا الفريق البيلعبوا ليه الاولاد
_كدي خليني في القروش قلت لي البيلعبوا بدوهم قروش كتيرة؟؟؟؟
*** بيدوهم البعيشوا بيه عيشة كويسة كناس محترمين
_ يعني بيريحم في الدنيا الما فيها راحة دي؟؟؟
***بالظبط كده
_كان انت بتعرف الناس ديل ممكن تخلي ولدي عبد القادر يجي يلعب معاهم؟؟؟
••• وانا اعتذر جذبني مرافقي ياخ ارح انت روحك طويلة
••• دخلنا الاستاد وخرجت الموردة منتصرة على الهلال بهدف بريش وانا (سايق واسفي في عيوني ودرب الرجعة ما عرفتو) قال مرافقي صديقي محمد خير محجوب متعه الله بالصحة والعافية عليك الله لو كنا ماسحين في الكورة زي عمك داك ما كنا ارتحنا من الوجع ده ؟!!
قلت ليه ابداََ ابداََ الكورة غالب ومغلوب وزي ما بنبكي الليلة فرحنا وحنفرح تاني فشكراََ جزيلاََ ونبيلاََ ووسيماََ وانيقاََ شكراََ طويلاََ وعريضاََ وعميقاََ لأبطال الهلال مع زملائهم الآخرين في المنتخب الوطني وهم يُبقون ( الشعب الجميل ) في مربع ( الفرح النبيل ) في زمن ( الأحزان والآلام )
دمتم رائعين الروعة زاتها
عبد المنعم شجرابي ..
