عبدالمنعم شجرابي يكتب: أنت إذاً مثلهم
*** كان لساننا السلام ..
كانت آذاننا السلام .. كنا دعاة السلام نفشي السلام واللهم أنت السلام ومنك السلام
( ولا للحرب )
*** قبل شهر من ( ضربها ) كان اليابانيون على قناعة تامة أن هيروشيما ( ستدمر ) فكانت اجتماعات المهندسين تتواصل ليل نهار للتخطيط لبناء هيروشيما الجديدة بعد الضربة
( والكلام ليك يا المطير عينيك )
*** يواصل الهلال خوض مبارياته التجريبية والسؤال هل هذه المباريات ( تصاعدية ) في مستوى المنافس؟؟ وهل وصل المدرب إلى ( التشكيلة الثابتة )؟ أما زال يجرب ويجرب وأسبوعان تقريباً هو كلما تبقى للأزرق لدخول منافسة
( مافيهاش يمه ارحميني )
*** أبحث عن وزارة تعمل بجد عدا وزارة الداخلية ثم وزارة الداخلية ثم وزارة الداخلية ووزارة الصحة
( ولا يزال البحث جارٍ )
*** الزول ده كلامو ياهو كلامو .. الزول ده جديدو ياهو قديمو الزول ده ( كيسو فاضي )
*** أخي د.معتصم جعفر رئيس الإتحاد السوداني لكرة القدم بعض القيادات حولك منهم من ( لهف ) التبرعات ومن ( أكل ) مال الإتحاد ومنهم ( والعياذ بالله ) من سرق ( مكيفات المسجد ) وإن لم تحاسب أو تتقدم باستقالك فوراً
( إنك إذاً مثلهم )
*** وزير الثروة الحيوانية ( المقال ) قال ( أنه باق ) ولا ولن ينفذ القرار
شخصياً قرأت قوله
( وما عرفت أضحك ولا ابكي ولا أتحمل ازاي ) كما غنى الفنان إبراهيم عوض
*** لو كانت هناك حكومة ( تحترم نفسها ) لأعلنت استيراد الأسمنت والسيخ وكل مواد البناء ورفعت عنها الجمارك
( وبرضو من غير ليه )
*** ( انت مالك ومال المريخ ؟؟) هكذا ( هجمني ) صديقي المريخابي بالسؤال
قلت : المريخ نفرح عندما ننتصر عليه ونحزن عندما نخسر من قبله وهذا أيضاً حالكم مع الهلال ولافكاكم لكم منا ولافكاكم لنا منكم
( وخلونا كده اخوة أعداء )
*** زول ( لا شايل ) سلاح ولا ( بيتو اتخرب ) ولا ( فقد عزيز ) ولا ( كهربتو ومويتو قاطعة ) وخليك من ده لا عندو إحساس بالناس و معاناة الناس وقاعد ( برة السودان ) ماكل وشارب ( ومرطب ) لا عجب ولا استغراب في دعوته لاستمرار الحرب
( ولا مش كده !!؟؟ )
عبدالمنعم شجرابي ..
