د . حسن التجاني يكتب: ..وهج الكلم..نحن ناس البير.. بتطلعونا متين……!!

د . حسن التجاني يكتب: ..وهج الكلم..نحن ناس البير.. بتطلعونا متين……!!

ناس كنار جدا ما قادرين يستوعبوا الذي جري ويجري لهم الآن من سكان الخرطوم …زي الزول الكان ماشي في ضلام وفجأة وقع في بير وما قادر

يطلع منها بالرغم من امكانيته للخروج من هذه البير المظلمة …لكنه لم يمت بعد ولكن (نفسه) مكتوم وهو يصرخ لإنقاذه ولكن للأسف لا احد يستجيب .

* شلل كامل وهبوط فكري وتفكيري مبالغ فيه في الذي يجب أن يفعله…. حاجة عجيبة.
* ليس من السهل أن يتخلي السوداني عن حقه حتي ان المثل عنده بقول لو خليت امك للودار ما تخلي حقك

للرجال.. وده منتهي عظمة الأم…لكن والله الدور ده في سرعة البرق خلي اي حاجة واتخارج بي رقبته.
* لأول مرة في تاريخ السودان السوداني (يجفل) تاركا

الغالي والنفيس وراءه موليا الادبار خاصة أصحاب الإمكانيات الجاهزة ديل غادروا أول الناس من اليوم التاني للحرب كانوا في المعابر …ياخي ديل عيدوا بره السودان حتي العيد ما انتظروه هنا .

* ما علينا… ده ما الموضوع …ناس قريعتي راحت (ناس نحن ديل).. لي يوم الليلة ما فاهمين حاجة .. ..ولا عارفين نمشي وين ونمشي كيف ذاتوا؟.

* ياخ في ناس جاهزين ماشاء الله عليهم نحن ما عارفين الكلمم منو…؟ نحن من الناس الواقعين في البير وبنكورك انقذونا …وزول جايب خبرنا ما في….المشكلة البير جابت ليها دانات متفجرة كمان يعني لو ما الناس ديل لحقونا بنلحق امات طه.

* اتحدي الناس الاتخارجوا ديل ونحن ناس البير …كان زول فينا فاهم حاجة؟ كلنا منتظرين …ومنتظرين شنو ولي متين ما في زووووول فينا عارف….بس منتظرين .
* (كبتة) وحلت بينا ….الكبتة دي تجيك فجأة بدون إنذار

وتشلك تماما لا تقدر تهرب منها ولا تقدر تكافحه بس تنتظر لمن تمشي يراها لكن الصباح بتخليك (قرد) بدون (موز)….ناس نهر النيل بعرفوا الكبتة لأنهم دائما مكبوتين بيها.

* الذي يحدث الان لإنسان الخرطوم كبتة…ما عنده اي خيار بس يدمدم في بيره دي لمن تنتهي وما يسأل عن الحاصل ليه ده شنو ؟ بس يعرف انه كبتة
وراحت بصبر مجهول المدة.

* أكثر من سبعة مليون نسمة من تعداد تسعة مليون سكان الخرطوم (تقريبا) فروا الولايات والمعابر الاتنين مليون ديل نحن ناس البير …منتظرين …ومافاهمين

حاجة…كل يوم يقولوا لينا قررررررربت ونحن مصدقين ومنتظرين لمن (جيوبنا)عطشت اقصد عطشنا…ومافاهمين حاجة

والغريبة لمن يقولوا ليك ارتكزنا تفرح لمن تقول مرقنا …الارتكاز طبعا معناه الجر من البير لي بره…
* نحن ناس البير صابرين وواثقين ومطمئنين خارجين خارجين طالما عندنا جيش انقاذي لكن متين …دي ما

تسألوني منها …التكتيك العسكري ده فهمنا فوقه زيرو
(تصبروا بس) .
* لكن بأمانة الحصل ده اثبت لينا انه نحن قاعدين في الخلا سااااي … ما عندنا اي فهم في الدنيا دي حتي

الكوارث ما جاهزين ليها….ياخ اقول ليك خاشين علي الشهر التامن ونحن في البير ما فاهمين حاجة ….بس سامعين فك اللجام فك اللجام وبرضو ما فاهمين حاجة.

* المهم بعد نسمع فك اللجام دي بتجينا ليك طوالي دانات كتلت مننا الميات….اي ونحن جوه الحفرة.

سطر فوق العادة:
يا اخوانا ما تعبنا ما تطلعونا من البير دي ….نحن ناس البير
..انتو صحي …(فك اللجام) يعني شنو؟
(ان قدر لنا نعود)