د .حسن التجاني يكتب: ..وهج الكلم.. عزمي عبد الرازق زول عجيب…!!

د .حسن التجاني يكتب: ..وهج الكلم.. عزمي عبد الرازق زول عجيب…!!

الاستاذ احمد التجاني كاتب شجاع وحروفه مقروءة جدا…كتب عن الاستاذ الشاب الانيق …انيق المفردة والمظهر عزمي عبد الرازق …مقالا انصفه فيه….وما قاله في حق عزمي انا اثني عليه تماما بحكم الزمالة والمعرفة الجيدة بيني وبين استاذ عزمي.

* قرأت مقال استاذ عزمي حول غياب رئيس الوزراء الذي غاب فجأة بطريقة تدعو للشك والريبة وتفتح ابواب الشائعة مصرعة علي جنباتها …وزي ما كتب احد الزملاء ايضا يحق لكل من هب ودب ان يكتب ما يريد لان د كامل لا يعمل في بيت اهله او كما قال كان يجب عليه ان يعلن اين ذاهب ولماذا ؟ لان هذا من حق الشعب يجب ان يكون في الصورة.

* ولما غاب د ادريس تساءلت ايضا انا في الوهج وقلت الزول ده مشي وين ليه فترة ما ظاهر مايكون شالته الهاشمية زي يوم زيارته لاسمرا .. يكون نزل الميدان دفاعا عن الوطن بالسلاح بعد تجمد نشاطه المدني بالوزارات….ولكن علمت انه ذهب مستشفيا باحدي الدول الاوربية …مع انه لو كنت محل د ادريس لرفضت العلاج خارج البلاد وهي تمر بهذه الظروف السيئة اقتصاديا وماديا وامنيا وان كان د ادريس يدفع من ال(50) الف دولار الخاصة به من احدي المنظمات والتي كان يسل منها (500) دولار البديها لي استاذ عزمي صدقة شهريا او كما قال محمد محمد خير مستشار السيد رئيس مجلس الوزراء ….بالله ده كلام ؟؟ وان كان حقيقة هل في داعي لرئيس مجلس وزراء يقول كلام زي ده

معناها ان رئيس مجلس الوزراء كان يحتكر كتابات عزمي لاجل الوصول للقمة الوزارية وهذه امنيته منذ كان يافعا…ولما بدأ عزمي يخلخل اعمدته التي وصل عليها اطلق كامل العنان لمستشاره محمد خير ليقول سوءا ملعونا في استاذ عزمي .

* عزمي زي ما قال التجاني صحفي محترم وشاطر…ولكن يبدو ان ناس مكتب د كامل ما عاجبهم قرب عزمي من سعادته وقصوا ليه وصرف ليهم بي رئيسهم د كامل…. بركاوي اصلي وتقيل والرهيفة التنقد.

* عزمي صحفي مهذب ومسئول واضحة عليه نعمة بر الوالدين قبلا ولاحقا …وانه متصالح مع نفسه ومع الاخرين و(لو افترضنا اخد ما ياخد ياخ)…. ليه كل الناس بتاخد اشمعنا الصحفي لو اخد بيكتبوا عليه (ود حرام) ومرتشي ..مع انه المسئول هو المحتاج للصحفي عشان يلمعوا ويصل وبعد الصحفي يوصلوا يقول ليك صحفي بي صحن فول.تشتريه…والله نحن بنعرف صحفيين بياخدوا بالاف الدولارات ومليارات الجنيهات السودانية وهم لا يكتبون فقط يوجهون بالكتابة عن المسئولين لصغار الصحفيين ..والان يخلفون ساق علي فخد ارجلهم وهم (الاعظمون) …عزمي صحفي شاب جدع لن تقتله تسريبات د كامل ولا اتهامات مستشاره محمد محمد خير …وسيظل محل احترام وتقدير الي يوم ان نغادر او يغادر .

سطر فوق العادة:

لا اتفق مع الكاتب الصحفي المعروف محجوب ابو القاسم رئيس تحرير اصدارة المقرن في الذي ذهب اليه اليوم بدعوته لمجتمع الصحافة والاعلام بترك المشاحنات والملاسنات والكتابات في الذي لايفيد والوطن يئن من جراحاته الغائرة ….اقول لاستاذ الحجاب كما يحلو لي مناداته مافي حاجة (غطست حجر) البلد دي …غير باركوها وكدي ده ما وكتها حسي….لو كان بفتحوا الجرح اول باول وينضفوه يا حجاب رغم الالم وحداثة الجر ح لما بترت الاعضاء …لكنا في وضع افضل كتير كتير….عارف يا حجاب
عشان تعالج الحديد وتشكله لمصلحة البلاد والعباد وكيف يريدون ..اطرقه وهو ساكن ..دقه دق جد لكن لو برد انسي وبعدها لن تستطيع معه صبرا….

(ان قدر لنا نعود)