د .حسن التجاني يكتب: ..وهج الكلم..الي فاشر السلطان تقودني روحي ثم احساسي ..الحلقة (4)…!!

د .حسن التجاني يكتب: ..وهج الكلم..الي فاشر السلطان تقودني روحي ثم احساسي ..الحلقة (4)…!!

نواصل العشق الدفين لفاشر السلطان….تعيش فاشر السلطان علي عهدنا هناك امن غير مسبوق واستقرار يطمئن حتي في المعيشة والحياة اليومية كل شئ في دارفور متوفر ..وفي الفاشر اذهب الاسواق اجد الخيرات متدفقة علي الارض واللحوم بكل انواعها الابل والضان والماعز ولحوم
الطيور جميعها يا سلام علي الفاشر وعظمة الفاشر وحليل الفاشر…وحليل العقيد محمد ادم ابكر وبارك الله في عمره امين الذي يقودك لاماكن اجود الاشياء من الطماطم وفول الدكوة الطبيعي الصافي النقي.

* الجو في الفاشر طبيعي هادئ لذا نادرا ما تصاب بالتهاب او ملاريا لا انكر ان الناس يمرضون ولكن ليست بالكثرة التي نجدها في الشمالية والجزيرة والخرطوم …لان روح التفاؤل هي سيدة الموقف والناس طيبون وكل زول في حاله ونفسه وشغله وبس.

* كل شئ منظم نصف ساعة واحدة فقط للافطار فغالبيتهم يفطرون في منازلهم اصلها قريبة من مواقع عملهم والباقين في مواقع عملهم …يعودون بعد الافطار بنشاط اكبر من وصولهم الصباحي في بداية الدوام فالناس في الفاشر يبكرون صباحا من صلاة الفجر …بعجلاتهم ودوابهم وسياراتهم ومواترهم تجد الحركة قبل مواعيد الدوام كثيفة …يشربون الشاي والقهوة ومن مسافات تشتم رائحة البن واللبن المقنن قبل شروق الشمس في الطرقات جيئة وذهابا…الناس في زيهم المكوي الانيق خاصة الموظفين باختلاف مواقع عملهم والسلاطين والعمد والملوك بجلاليبهم البيضاء ذات (الظهرة) التقيلة يسعون لمساعدة زوبهم واهليهم وجيرانهم بالشهادة لهم
لاستخراج مستنداتهم واوراقهم الثبوتية بحكم مهمتهم ومعرفتهم اللصيقة بالمجتمع الذي هم فيه….وهذا عرف متبع ومعتمد لدي ادارة السجل المدني في شهود كبار القبيلة.

* يتسارع الكل للحاق بمواقع عملهم…فالضبط والربط في المواعيد صارمة …ولا رحمة فيها ….الانتاج عالي في كل شئ
في الاعمال الخاصة والعامة في دواوين الدولة والمستشفيات …والضرائب والزكاة
و(دمغة الجريح ).

* في مركز السجل المدني نستقبل اصحاب المعاملات …بصورة منظمة توزع عليهم الارانيك لملئها وتجهيزها لتقديمها لجهة الاختصاص علي الكاونتر…كنا نعمل بعدة جهات نجهز ونبني ونطلي الطلاءات ونجهيز المركز ليصبح جاهزا ليليق بالمواطن وبانسان الفاشر.. السلطان الذي يستحق كل الخير والعون والمساعدة….علي فكرة انسان دارفور الهناك ده اصلا مازول دارفور الفي اوربا و لا هو حتي زول دارفور الفي الخرطوم ….ده زول من طينة وعجينة اخري …ياهو الزول السوداني الاصيل البقولوا عليه
السوداني.

* ننتهي من خدمة المواطن ونطمئن علي سلامة اجراءاته ..بي فرح شديد ونشوة وكل شئ في محله …عيسي المسيح ما ظهر الله لا عاده هو سبب عكننة امن الفاشر….نقوم بعد داك بذات الفرح والنشوة نشوف فطورنا… مية دعوة تصلك في (متتالية عددية) للفطور من اهل الفاشر تصلك بكل طيب خاطر وصدق وليس مجاملة او (كشكرة) …الناس ديل هناك ما بعرفوا اللف والدوران والنفاق ناس صادقين تمشي تفطر معانا يعني خلاص تمشي… يظهر في اللحظات دي زول اسمه فيصل الان ضابط اعتقد في المشتركة ان لم اكن مخطئ المهم فيصل كان مواطن ملكي علي ايامنا هناك …يلا يا سعادتك الليلة حرم فطوركم معاي انت ضيفنا نمشي المواشي….المواشي يا سادتي سوق كبييير ودنيا قائمة بذاتها فيه كل شئ …الجزارات والخضارات والمحلات الخاصة بالشواءات…..وما لز وطاب من الطعام….علي فكرة فول مافي والله الا (تشتهييهه).. فيصل يقول ليك انا قدامكم يا سعادتك

ياعبد العزيز جيب سعادتو عند ناس زبيدة …عبد العزيز ده مساعد في الادارة بالسجل المدني من الملمين بتفاصيل البلد كلها وعارف اي شئ وانا طبعا زول كرت لكن برضو شفت يعني ناقش شوية اصلي جيت مأمورية الفاشر مرة لمن كنت في المباحث قبل زمن فات شوية.. فنظام الولد ملم يعني وكده..
جدا يا فيصل نحن بي وراك زبيدة مش كده؟ تمام ..نظام الولد مقطعها….ولو فكوني براي (بلية واتدردقت) في شارع ظلط دون اتجاه ودون فهم بارك الله في عبد العزيز ….(منقذ الشفوتة …شفوته قال).

* ده كان اليوم التالت لي في دارفور الفاشر …مستمتع ياخ ومليان حيوية ونشاط وتفاؤل
..وصلنا المواشي … شارع ظلط تخيلوا الفاشر مربوطة بي اسفلت داخليا ….تقول لي (مهمشين)!!؟ …في المواشي فيصل يلوح لنا بيده للمكان فقد تم تجهيزه تماما ….فور وصولنا رحبت بنا الحاجة زبيدة….زبيدة تملك مكان جاهز زي محلات سمكنا وصاج السمك بالعمارات والطائف بالخرطوم لكن علي نظام بلدي خالص الواطة (تراب مرشوش) وفوق منها بلاط والبخور معطر والتكييف (اسبلت) والتلاجات (ديب وعادية)..الكهرباء طبعا مبرمجة والمولد موجود قدام المحلات الكبيرة زي محل زبيدة
لحفظ الفواكة والعصائر والموية الباردة والتلج…..واقسم بالله البقول فيه ده كله ما (كسييييير تلج )ده حقيقة.

تم اغلاق الستائر نظام الخصوصية اصلي لابس كاكي وع العزيز حرس بلا مهمة……لان الامن اصلا مستتب
خمسة دقائق والشية بي بوخها علي صينية كبيرة ومعاها الشطة والسلطة الخضراء الجرجير (الكولوروفيل) من طبيعة المنتج لامن مسود لونه من الخضرة الطبيعية والبصل الاخضر مفرهد….شئ عجيب.

* طبعا لو.طلبت عيش مع الاكل بيضحكوا عليك ….انا فضلت منتظر العيش والناس منتظراني ابدأ وانا راجي العيش ….قلت ليهم يا اخوانا وين العيش نظام الولد اكتشف حاجة …(فقعوها ليك ضحكة) عبد العزيز في انضباط شديد يا سعادتك هنا الشية بدون عيش (تمضغ وتبلع) طبعا عبد العزيز عارف لو طلع من الضبط والربط حسابه عسير
لا يجروء …لكن حاشا لله ضبطهم وربطهم ارفع من عسكر الخرطوم بمراحل .

* ضربنا الشية وحلينا وشربنا الشاي (دم الغزال) والقهوة وتب وقفنا لمبة… شكرا زبيدة …سجليني زبون دائم تاني من الليلة….مرحبا سعادتك تشرف سعادتك مكانك محجوز ومحفوظ… بالله شوف الادب والكرم ده والاحترام ….وين الحقد ..وين العنصرية وين الجهوية البتقولوا فيها يا شباب دارفور في اوروبا ؟؟؟!! ….لله درهم اهل الفاشر في السودان ….دي فاشر السلطان.

* في الطريق وانا راجع من المواشي لمكتب السجل المدني كل شئ مرتب كله في محله بوليس لاابس كاكي منتشر طلاب راجعين صغار من المدرسة لبسهم لبس مدارس شايلين شنطهم علي ضهورهم تقول لي تهميش …مهمش انت يا (طريد) دارفور يا من عشقت دول الغرب وثقافتهم تبا لك ان
تؤاجج امن بلد الملوك والسلاطين..ايها الطائش العاق لوالديك ولوطنك …الذي تسعي لبيعه بابخس الاثمان.

* شبع جد وروح معنوية مرتفعة فوق ….وصلت المكتب جمهور بالكوم شغل منظم كل موظف في مقعده وامامه الكمبيوتر وكله برامج دقيقة علي فكرة اهل دارفور (ازكي واذكي) شعب السودان في الرياضيات والفيزياء كما الشان في اللغة الفرنسية ….واشطرنا في الكيمياء …كل الموظفين لا يسألونك عن كيف يعمل الجهاز او به عطل كما عسكر الخرطوم وغيره ….يحل المشكلة بنفسه الا اذا تعذر الموقف وعصي فالخرطوم هي الاقرب …بمختصييها وفنييها.

* الفاشر تقودني اليك روحي ثم مشاعري النبيلة تجاهك …فانت امنة طالما لم يدخلك عيسي المسيح تبا له..

سطر فوق العادة :
عيسي المسيح …في الواقع هو عيسي (المسيخ)…يشبه في خصاله وسلوكه سلوك وافعال ال دقلو قبل التمكين وقبض الريال والدولار ….فكانوا رباطة وقطاع طرق وعصابات نهب وسلب وعيسي الحلو تاجر مخدرات….عندما يدخل الفاشر خلسة يرتفع (الضغط الامني) اسف (الاستعداد الامني) لدي الشرطة ..نواصل احوال امن الفاشر حين يلج عيسي (المسيخ) اليها.
للتواصل واتس مباشر ..(00249123906060)

(ان قدر لنا نعود)