د .حسن التجاني يكتب:..وهج الكلم..الفريق ش سراج الدين منصور …!!

د .حسن التجاني يكتب:..وهج الكلم..الفريق ش سراج الدين منصور …!!

يبدو اننا لن نخلص من انتقادات استاذ حافظ الخير الصحفي المعروف والمتخصص في صحافة الجريمة و(اخرون ) انتقاداته التي يرسلها من خارج الحدود علي وزن اذن سمعت وعين لم تر….وعندما نقول لم نخلص لست متحدثا حاليا باسم الشرطة فالشرطة لها متحدثا رسميا كامل الدسم يسمي العميد فتح الرحمن التوم واعجبني انتشاره في وسائل الاعلام هذه الايام وعلقت علي ذلك في احدي القروبات التي ملأت الدنيا وفاضت …قلت ان ود التوم مسك الدرب تب لله دره.

* هذا ليس موضوع وهج الكلم اليوم ….انما موضوعنا مادار عبري بين استاذ حافظ الخير والفريق د سراج …الاستاذ حافظ كتب مقالا من (قصره العاجي) بقاهرة المعز…. ( انا ماعارف المعز ده منو لكن بقولوا كده) …عن تصريحات السيد الفريق شرطة د سراج منصور حول الوضع الامني بالبلاد والذي مشكورا بشر فيه مواطني ولاية الخرطوم بتقدم امني ملحوظ في ولايته التي يديرها
بكل جدارة ودقة متناهية ….وقد سجل فيها نجاحا يحسب له ويضاف….وكنا قد شفقنا عليه ولا ننكر بدءا …ولكنه ازهلنا حقيقي واخرسنا بما انجز حتي اليوم.

* حافظ اصلو ما بعجبو العجب ولا الصيام في رجب…. او كما يقولون… كتب يقول وبي (نمرة اربعة) ليست بالمدينة الفاضلة ياسراج….(ده حافظ… ايوه والله كتب كده)…وكلنا اطلعنا علي ما قاله الفريق سراج عبر الاعلام قال وليست الخرطوم هي مدينة (اليوتوبيا)… لكن سراج قال الوضع الامني افضل مما كان عليه اولا وهو محق…ودعى المواطنين بالعودة لديارهم لتعميرها وتجهيزها للاستقرار وقد ضمن لهم الامن من واقع دفاتر احواله وانتشار قواته في كل زمان ومكان ….وجاهزيته لانزال ذلك واقعا …معقول نغالطه؟.

* واصل حافظ مقاله وكتب ان الامن غير متوفر في الاطراف كما زعم الفريق سراج انما في وسط العاصمة يمكن .. فمازال السجناء طلقاء يمارسون اجرامهم بارتداء الزي العسكري وينهبون الناس اكراها…ويري حافظ ان هناك كثر هاربون من العدالة لم يتم القبض عليهم بعد …وهم مختبئون في المنازل الخالية من اهلها….ومازالت مسروقات المواطنين تباع علنا في الاسواق علي (سمع وشوف) …واقترح حافظ بعض المقترحات منها تفعيل العمل الجنائي….(انا ما عارف حافظ ده عاوز يفعلوا ليه الجنائي اكتر من كده كيف؟)…ممكن يكون قاصد لابد من الاستمرار وعدم التوقف …وقال توفير الاعاشة للمنتظرين والاهتمام بالكادر الشرطي….في الاخيرة دي يا حافظ اتعداك العيب …اصلو حافظ ده قبل يدخل الاعلام ويبقي صحفي بعد التخرج كان شرطي …وطيب انتو قايلين فلسفة الاقتراحات والجنائية دي جابه من وين ؟ من الشرطة طبعا .

* انا شلت مقال حافظ (بي صمة خشمو) وديته للسيد الفريق الدكتور سراج مدير شرطة ولاية الخرطوم اصلو مقال حافظ وجعني جد وحسيت انه حافظ ده مابراه عاوز يقول حاجه بس ما عرف يقولها كيف؟

* انا عارف حافظ كتب كده ليه؟؟! بس ما كلمت الفريق ولا بكلمكم انتو برضو …لانه عارف الشرطة لا تتعامل بردود الافعال وانها باااااااااردة في التجاوب مع الاستفزازات.. اصلو الناس (دول) بدربوهم علي كده في الكلية ومدارس التدريب العسكرية …درجة التحمل تصل عندهم درجة (الزيرو) .

* لكن الفريق سراج رد عليه بادب العارفين الواثقين الملمين بمفردات العملية الامنية بالولاية
وقص عليه القصة كل القصة…اصلو حافظ فات عليه ان د سراج ضابط رئاسات ومكاتب تنفيذية تحديدا فضلا عن انه ضابط شرطي كامل الفهم الشرطي ودي بتعلمهم فن ايقاعات الردود علي الاسئلة مهما كانت قاسية ومعقدة وشائكة …(انت فاهم حاجة من كلامي ده ).

* د سراج رد لي حافظ بصورة غير رسمية علي ما كتب …قال ليه اولا لاتوجد تشكيلات اجرامية بالعاصمة كما تعتقد وتخمن و الشرطة منتشرة بارتكازات في كل ولاية الخرطوم تغطية كاملة …وان اقسام الشرطة بلغت عدد(103) قسما تعمل بكفاءة عالية جدا من عربات وامكانيات وسلاح وقوة عسكرية … وهي جاهزة تماما لجعل الامن واردا بين المواطنين في الولاية…اما بخصوص اعاشة النزلاء لاول مرة بعد (14) عام توافق وزارة المالية الاتحادية علي تغطيتها كاملة شهريا واستلمنا اول شهر كاملا بحمد الله وفضله ولن تتوقف مرة اخري … وكرر سراج حديثه ان المدينة الفاضلة ليست موجودة في اي دولة من بلاد العالم اجمع ….ولم نقل ان الخرطوم صارت مدينة فاضلة بعد ولكن نجزم ان امنها بخير جدا واكثر …وعلي المواطن ان يعود ….الفريق سراج قال لي حافظ الان كل سجون الولاية جاهزة وتعمل بكفاءة ممتازة وكنت اتمني ان تزورها مع الصحفيين الذين شرفونا في زيارة تاريخية كان افضل ان تري وتسمع افضل من ان تكتفي بالسمع فقط وانت خارج البلاد .

سطر فوق العادة:

ما قلت ليك ياحافظ ما تهبش بتقرص….ما بتسمع الكلام … اها الزول ده ما خلي ليك سؤال وما جاوب ليك عليه بالدليل القاطع واتحداك كمان …. قال ليك (تعال كان تقدر… ) الاخيرة دي من عندي انا ….هو قال نتمني تزور الخرطوم وتقف بي نفسك علي امن ولاية الخرطوم …..اها يا استاذ حافظ الخير بعد ده كان طلعت من طورك المائي انا (ببلك) …القصة كلها بقت (بل بس)….علي فكرة حافظ الخير من الصحفيين الذين يجيدون كتابة التقارير الصحفية بامتياز …لكن عندما يكون بالسودان .

(ان قدر لنا نعود)