د حسن التجاني يكتب : السيد الوالي.. لا تهدأ كتابة تقريرك الشهري وجبت..!!
وهج الكلم
د حسن التجاني
السيد الوالي.. لا تهدأ كتابة تقريرك الشهري وجبت..!!
* قبل فترة اتكلمنا في الوهج عن جهود السيد أحمد عثمان حمزة والي الخرطوم صاحب الدورتين (نص كلتش) لان الأولى لم تكتمل والثانية الله يستر…حقيقي الوضع بقي مخيف ولا استقرار مهني لاي صاحب وظيفة خاصة لو كان (….) او كوز … ما علينا. . العلينا الوالي احمد زول مجتهد ومتحرك لكن واضح ما بقرأ ما نكتب له… دون (من) ولا (أذي)…والا كان عمل واجتهد وانجز .. والا خسارة حبرنا المسكوب (هدر) .
* الوالي مازال يشتت في جهوده وقد نصحناه بعدم التمدد تنمويا الا شارع شارع
وينتهي فيتجه لآخر.
* نصحناه بإنزال ضباطه التنفيذيين الي الشارع والمتابعة والملاحقة وللأسف لم نشهد ضابطا واحدا من تنفيذييه في مكان عمل يخص الولاية او محليته في الطريق العام ..وكأن السيد الوالي يراه لوحده ولايود الاستماع لآخر في أمر ولايته ولا يدري نحن أهل الولاية و(الحادبون) علي مصلحتها…
* قلنا للسيد الوالي البطء ماحبابه…والآن العمل حركة سلحفائية مملة وكأنه الجري في محل الوقوف علي حديث العسكر…
* نكرر اليك السيد أحمد تلاتة نقاط تخرج بك لبر الأمان…بل تجلب لك رضاء المواطن…و(علي الأقل ده حقه يارجل) .
* سادت الفوضي بالأسواق وظهرت أسواق السبت ..(هو الناس خلصت سوق الجمعة عشان يظهر سوق السبت؟)..هذه الأسواق وصمة عار في جبين السيد الوالي وحاشيته في الضباط الإداريين الذين غلبهم الشغل (عدييييييل).
* كل (الخضار) مفروش علي الارض مباشرة علي (تفاف) العاملين مباشرة اسفل كوم تراب او بجوارالخضار ..هذا أمر ..
اما الأمر الثاني تترك كل هذه الرواجع من الزبالة لتصبح أكوام نفايات ولك أن تتخيل؟
* بالله السيد الوالي أمشي فقط يوم واحد أسفل كبري السوق المركزي الطائر جوار المدينة الرياضية وشاهد بأم عينيك الذي يجري هناك عقب صلاة المغرب مباشرة.. وقسما تعالي ان لم تجعل لك مكتبا هناك (كمحاكم الطوارئ) علي زمانها… يسمي مكتب (طوارئ الوالي) .. فأنت تحتاج (لمراجعة)…
* السيد الوالي الوضع لا يحتاج تخطيط وانتظار او بلغة اهلنا البسطاء (دايرلو تلفت) ..بل يحتاج حركة طارئة وسريعة وعمل ميداني وقانون صارم علي الأقل تضمن استمرارية القوات المشتركة لإعادة ترتيب الأمن بالولاية الشغالة اليومين ديل حتي لا تفتر فتتوقف او تذهب لعمل آخر غير هذا..وهو المهم.
* اخي الوالي حقيقي التقارير المعلبة ما حبابها..حباب الشوف والمتابعة والملاحقة والقرار.
* السيد أحمد عثمان انصحك ما تسافر للوقوف علي تجربة دول اخري في النظافة او التخطيط الاستراتيجي.. الجماعة ديل بجهزوا ليك السفر لغاية الفندق خمسة نجوم هناك والطائرة (فيرست كلاس) و(بودعوك) …شوف هنا يا اخوي وخليك هنا.. والله جد.
سطر فوق العادة :
* حتكتب شنو في تقرير انتاجك الشهري لو مشوار الميل انتهي وتوقف فجأة كده ؟
(لوقدر لنا نعود)
