عبد المنعم  شجرابي يكتب  مرحبتين بلدنا حبابا

عبد المنعم  شجرابي يكتب  مرحبتين بلدنا حبابا

*** الاتحادي غير مشارك .. البعث غير مشارك .. الشيوعي غير مشارك .. الأمة ( سيد الاسم ) غير مشارك .. طيب ( عشان ايه ولي شنو وبي منو ) قام مؤتمر المائدة المستديرة ؟؟
*** مبارك الفاضل .. د.أحمد بلال .. أبو قردة .. موسى محمد أحمد .. ميادة سوار الدهب .. التيجاني السيسي .. وجوه شبعت منها السياسة السودانية في كل المؤتمرات .. مع جزيل الشكر للتوم هجو الذي غاب قاصداً أم غير قاصد فأسعد المشهد بالغياب
*** متى ما ردد المريخاب ألا بديل لحازم إلا حازم إلا ووجدوا سوداكال ( متحزم قاعد )
*** جديد استعداده لهذا العام أن الهلال ( الوطن الأصغر ) سيقيم معسكره ( بالوطن الأكبر ) تحت شعار ( مرحبتين بلدنا حبابا )
*** لي فيها علاقات طيبة وصداقات ممتدة مميزة ولها في القلب مكانة وطبيعي أن أفرح بصعود الحلفايا أكثر من فرح أهلها ويا صديقي العزيز الجنرال عمر عبدالرحيم أبوبكر ( يباركو ليك ويباركو لي )
*** لا أدري كم صرف عليه من مال؟؟ وكم أهدر عليه من وقت ؟؟ ولكن ( بالجد جد) مؤتمر المائدة المستديرة ( اريتو ما قام )
*** أحب بورتسودان وعشق الهلال وأخلص له وأذكر كيف لازم البعثة في آخر مرافقة لي للهلال للثغر الحبيب ألا رحم الله لاعب الهلال السابق وابن بورتسودان الرقم عبدالله أوهاج
*** ما شاء الله والصلاة على النبي وعيني باردة .. النجيل أخضر سندسي يقول ( يا ليل ) والمنظر العام أجمل من جميل وعفواً أنا لا أتحدث عن الجوهرة الزرقاء أنا أتحدث عن ملعب الهلال الرديف
*** لا أعذار ولا غيابات ويا عبدالمهمين الأمين يا مدير الكرة بالهلال حضور اللاعبين واستعدادك شخصياً لموسم استثنائي لازم يكون ( مية المية ولي فوق شوية )
*** منذ ثلاثين عاماً وضف عليها ثلاثة والوجوه ( ياها زاتا ) .. ثلاثون عاماً وضف عليها ثلاثة والوجوه التي شاهدنا ( السبت ) بقاعة الصداقة هي نفس الوجوه دون ( تغيير ) في الهدف وبنفس ( المطلوب ) والصوت والصورة
نعم ( الزول ياهو نفس الزول )
عبدالمنعم شجرابي ..

مقالات ذات صلة

زر الذهاب إلى الأعلى