عبد المنعم شجرابي يكتب الكبير كبير
عبد المنعم شجرابي يكتب الكبير كبير
*** لأول مرة في التاريخ كان أمس السبت يوم الإجماع السوداني وكل القوى السياسية بيمينها .. ووسطها ويسارها .. وجميع الطرق الصوفية والإدارات الأهلية تجمع جميعها أن مؤتمر المائدة المستديرة كان فاشل .. فاشل .. فاشل ( بتقدير ممتاز )
*** المسكنات لم تضمد جرحاً والجراحة لم تجدي وكل العمليات لتجميل انقلاب 25 أكتوبر أخرت ولم تقدم شئياً و9 أشهر ( والحال ياهو نفس الحال )
*** 21 قاطرة جديدة وصلت للسكة الحديد من الصين وللتذكير فلا علاقة لوزير المالية الحالي د.جبريل بهذه القطارات ( لا من بعيد ولا من قريب )
*** إلى اللاعب والكابتن المميز جكسا .. إلى المدرب والإداري القدير جكسا .. إلى الهلالي والقومي جكسا .. إلى صديقي العزيز المهذب المؤدب الكابتن نصر الدين عباس جكسا .. 13 أغسطس هو يوم ميلاد جكسا ( وكان انت نسيت أنا ما نسيت ) وكل ساعة وانت طيب
*** وللعلم فجكسا كانت ( خدمته الوطنية ) 14 عاماً للهلال والمنتخب + 3 سنوات في الربيع لمنتخب الخرطوم .. يعني 17 سنة رفع فيها علم السودان أكثر من 60 مرة .. ( والكبير كبير )
*** بينما يسعى المريخ لمعاقبة الهلال بسبب الصيني جاءته ( وبما نوى ) المعاقبة ( تارة ) من كاس .. وساقية مشاكل المريخ الدائرة لا تكف عن الدوران ( وحوالينا وماعلينا )
*** الزول ده جرب كل الطرق وما وصل .. الزول ده شاف كل الحلول وما لقى حل .. الزول ده خلاص ( وصل الميس )
*** مشاركة مبارك الفاضل في مؤتمر المائدة المستديرة في الستينات ومشاركته في مؤتمر المستديرة مؤخراً ووجوده وزيراً بالقصر مع كل الحكومات الشمولية تؤكد أن السودان ( شاخ ) لأن السياسي فيه ( لا يشيخ )
*** المادح في سوق أمدرمان فارش عمته ويمدح والناس تخت ليه القروش في العمة وبعد الحصالة بقت تمام ..
جاء شماسي خطف العمة بكل الفيها وجرى
المادح جدع الطار وجرى وراهو وما حصلو جاء زعلان شديد ..
شال الطار بتاعو وعايز يمشي وهو في غاية الغضب فجأة جاء واحد ما عارف الحاصل قال ليه أمدح لينا (شفيع الأمة ) ياشيخ ..
المادح قال ليه عليك الله دي أمة يشفعوا ليها.؟؟
*** واستغفر الله العظيم لي وله ولكم
عبدالمنعم شجرابي ..
