مقالات

  عبدالمنعم شجرابي يكتب من الكاس للجماهير

عبدالمنعم شجرابي يكتب من الكاس للجماهير

* ما تصورته جماداً جامداً وتخيلت أن كأس السودان ( كائن حي ) له عقل وعينين وأذنين ولسان وشفتين .. خلت ذلك من بعيد وساقني الفضول ونزلت وبالفعل اقتربت منه فوجدته كما تخيلت يتحرك ويتنفس

* مددت يدي إلى يده سألته ( كيفك يا مدهش ؟؟) قال ” كيفي كيفك أنا فرح سعيد ومبتهج ”
قلت ” كدي قول بسم الله واحكي بكل التفاصيل ” .. استعدل في جلسته ( وأخذ هزة ) وقال

” يا خالي شجرابي عليك الله ناس سدوا ضوء الكشافات فرحاً كيف ما أكون بيهم ومعهم فرحان .. ناس حلوين زي ديل كيف ما أكون منهم وفيهم .. عليك الله يا خال كيف ما أكون مع ( الناس القيافة ) .. يا خال والله ما ممكن تصور أنا كنت متوتر وخايف

قدر شنو كنت خايف ( أطير ) منكم صدقني كان ممكن ( أدشدش حتة حتة ) لو مرقت من نادي الهلال .. يا خال والله البيت الأبيض ده حاجة عجيبة هيبة وعظمة وأبهة وروعة .. ناس حكومة وأهالي ”

* وأنا استمع إليه واصل الكاس ” والله يا خال لو تذكر أنا كنت في فترات كده بعيد من نادي الهلال صدقني أنا كنت عايش غربة وقاعد في ( منطقة شدة ) كنت عايش أسير بمعنى الكلمة .. لا صديق ولا رفيق عايش ضلام جد ورافع يدي لي ربي

يجي الهلال ويفك أسري لا حول ولا قوة إلا بالله أيام صعبة بالجد ( الله لا عادا ) ويا ظلام الهم على أبوابنا ما تعتب ”
* سارعت بإخراج الكأس من هذا المقطع الحزين وسألته أها دلوقت كيف يا أبو الشباب رد قائلاً ” بالله عليك ده سؤال ده زول قاعد في الجنة يسألوه عامل كيف؟؟ ياخي قوم لف ”

* واصلت والله يا أبو الشباب الونسة معاك حلوة لكن أنا شوية مستعجل وماشي الجريدة أكتب
* أخذ الكاس ( هزة نشوة ) وكعصفور يستحم في بركة ماء واصل الهز ثم قال ” كان كدي وقعت لي في جرح حلفتك بالله

أشكر لي كتير شعب الهلال ومجلس الإدارة والأقطاب وشيل الشكر لفلوران وخالد بخيت والجهاز الفني كلو واللاعبين واحد واحد وقول ليهم شرفتوني وعزيتوني ورفعتوا راسي وانتو ( تجددوا لي الإقامة ) في الهلال ( النادي القامة ) وأنا إن شاء الله

من ناديكم ده ما مارق تاني ماني مارق أنا أنا .. أنا ده ( افوتكم؟؟ ) حاشا حاشا ( أفوتكم أقبل وين ) ”
عبدالمنعم شجرابي

إشتياق الكناني

صحيفة العهد اونلاين الإلكترونية جامعة لكل السودانيين تجدون فيها الرأي والرأي الآخر عبر منصات الأخبار والاقتصاد والرياضة والثقافة والفنون وقضايا المجتمع السوداني المتنوع والمتعدد
زر الذهاب إلى الأعلى